Qyzylorda men Túrkistan oblystarynda aýa raıynyń qolaısyzdyǵynan kólik qozǵalysy shekteldi
Qyzylorda oblystyq tótenshe jaǵdaılar departamentiniń málimetinshe, aımaqta aýa raıy kúrt nasharlady. Qar aralas jańbyr jaýýda. Kórý múmkindigi tómen.
«Osyǵan baılanysty «QazAvtoJol» AQ Qyzylorda oblysy boıynsha fılıaly málimetine sáıkes, 2 aqpanda Astana ýaqytymen 5.40-tan bastap respýblıkalyq mańyzy bar «Samara-Shymkent» avtomobıl jolynyń 1357-1806 shaqyrym aralyǵyna barlyq kólik qozǵalysyna ýaqytsha shekteý qoıyldy. Ol Aral aýdany ortalyǵynan Qyzylorda qalasyna deıingi aralyqty qamtıdy», - dep jazylǵan habarlamada.
Sol sııaqty, Túrkistan oblysynda da jaýyn-shashyn saldarynan birqatar joldar jabylýda. Kesheden beri jaýyn-shashyn kóp bolyp, tuman túsýine baılanysty polıtsııa júrgizýshiler men jaıaý júrginshilerge joldarda saq bolýdy eskertedi. Sebebi mundaı aýa raıynda kólik quralyn basqarý qıyndap, jol kólik oqıǵalarynyń bolý yqtımaldyǵy artady. Sondyqtan jaýyn saldarynan jol ústinde bolatyn kóktaıǵaqta jol qozǵalysy erejelerin qatań saqtaý qajet.
Osyǵan oraı polıtsııa qyzmetkerleri Sozaq aýdany arqyly ótetin «Ulanbel-Sozaq-Ekpindi», Báıdibek aýdany boıynsha «Shaıan-Sholaqqorǵan» tasjoldary ýaqytsha jabylǵanyn habarlady.
Odan bólek oblystyń Arys, Qazyǵurt, Ordabasy, Saıram, Tólebı, Sozaq, Saýran aýdandarynda aýa raıy kúrt ózgerip, qar aralas jaýyn-shashyn tolastamaı tur.
Sondyqtan polıtseıler eń aldymen jol qozǵalysy erejelerin muqııat saqtap, jyldamdyqty arttyrmaı, qashyqtyqty, jol belgileriniń talaptaryn oryndańyzdar dep keńes beredi.
Sondaı-aq asa qajettilik bolmasa jolǵa shyqpaýǵa shaqyrady.
