Qyzylorda men Saýd Arabııasy ýnıversıtetteri yntymaqtastyqty kúsheıtpek
Saýd Arabııasy Koroldiginiń Hanzada Mohammad ben Fahd ýnıversıtetiniń resmı delegatsııasy Qorqyt Ata atyndaǵy Qyzylorda memlekettik ýnıversıtetine resmı issaparmen keldi. Joǵary oqý oryndarynyń arasynda ózara yntymaqtastyq týraly memorandýmǵa qol qoıyldy.
Kezdesýge Saýd Arabııasy Koroldiginiń Hanzada Mohammad ben Fahd ýnıversıtetiniń rektory Issa Hassan Alansarı men ýnıversıtettiń basqa ókilderi jáne Qorqyt Ata atyndaǵy Qyzylorda memlekettik ýnıversıtetiniń rektorat músheleri jáne BAQ ókilderi qatysty.
Aldymen Qorqyt Ata atyndaǵy Qyzylorda memlekettik ýnıversıtetiniń oqý isi jónindegi prorektory - birinshi prorektor Abaıbek Talǵatuly Júnisov sóz sóılep, ýnıversıettiń aǵymdaǵy jetistikterin saralady.
«Elbasy óziniń Ult jospary bes ınstıtýtsıonaldyq reformasyn júzege asyrýdyń 100 qadam atty maqalasynyń 78-qadamynda: Nazarbaev Ýnıversıteti tájirıbesin eskere otyryp, JOO-nyń akademııalyq jáne basqarýshylyq derbestigin kezeń-kezeńimen keńeıtý. Kommertsııalyq emes uıymdardaǵy jekemenshik JOO-laryn halyqaralyq tájirıbege sáıkes transformatsııalaý týraly naqty aıtyp ótkeni belgili. Bıyl oblys ortalyǵyndaǵy ǵylym men bilimniń qarashańyraǵyna 80 jyl toldy. Ýnıversıtet QR kópsalaly úzdik joǵary oqý oryndarynyń ulttyq reıtıngisinde 10-shy oryn ıelendi», - dedi Qyzylorda ýnıversıtetiniń birinshi prorektor Abaıbek Júnisov.
Búginde AQSh, Ulybrıtanııa, Kanada, Germanııa, Avstrııa, Ispanııa, Italııa, Polsha, Koreıa, Túrkııa, Egıpet jáne Reseıdiń JOO-men, bilim jáne mádenı ortalyqtarymen, jetekshi ǵylymı ortalyqtarymen, qorlarymen jáne qoǵamdyq uıymdarymen áriptestik qatynastar ornatyldy, halyqaralyq yntymaqtastyq salasynda 75-ten astam kelisimsharttar men memorandýmdarǵa qol qoıyldy.
Óz kezeginde sóz alǵan Saýd Aravııasy Koroldiginiń Hanzada Mohammad ben Fahd ýnıversıtetiniń rektory, professor, doktor Issa Hassan Alansarı aldaǵy ýaqytta áriptestik baılanysty odan ári nyǵaıtýǵa kúsh salatyndyǵyn jetkizip, ýnıversıtet ujymynyń jumysyna tabys tiledi.
Saýd Arabııasynyń delegatsııasy ýnıversıtet murajaıy men birinshi oqý ǵımaratyndaǵy arab bóliminiń stýdentterimen kezdesti.
Aıta keteıik, 2013-2014 oqý jylynan bastap ýnıversıtet «Shetel tili - eki shetel tili» mamandyǵynyń «Aǵylshyn-Arab», «Aǵylshyn-Qytaı» jáne «Aǵylshyn-Koreı» tilderi baǵyttary boıynsha mamandar daıarlaýdy bastady. Qazirgi kezde aǵylshyn-arab bólimshesinde 53 stýdent bilim alady. Onyń ishinde bıylǵy oqý jylynda 24 stýdent oqýǵa qabyldandy. Shetel tilderin oqytýda Egıpetten, Amerıka Qurama Shtattarynan jáne Koreıa Respýblıkasynan shaqyrylǵan sheteldik oqytýshylar úlken úles qosýda.
