Qyzylorda men Qyrǵyzstannyń Naryn qalasy ózar yntymaqtaspaq
QYZYLORDA. QazAqparat - Búgin qala ákimi Nurlybek Mashbekuly jáne Qyrǵyz Respýblıkasy, Naryn oblysynyń ortalyǵy Naryn qalasy joǵary keńesiniń birinshi vıtse - spıkeri Jaanbaev Ýlanbek Jýnýsuly «Qyzylorda jáne Naryn qalalary arasyndaǵy saýda-ekonomıkalyq, ǵylymı-tehnıkalyq jáne mádenı baılanys» týraly memorandýmǵa qol qoıdy.
Bul týraly QazAqparat tilshisi habarlady.
Kezdesýge Qyrǵyz Respýblıkasynyń ІІІ dárejeli memlekettik keńesshisi, Qyrǵyz Respýblıkasynyń Ulttyq ǵylym akademııasy prezıdentiniń ǵylymı hatshysy Ormýshev Kalnýr Keldıbekuly, «Qyrǵyzstan» partııasy tóraǵasynyń orynbasary, Naryn qalalyq keńesiniń depýtaty Kýrmanov Davıd Ýsenbekuly jáne Qyzylorda qalasynyń aktıvi qatysty.
Júzdesý barysynda qala ákimi N.Nálibaev Qazaq eli men qyrǵyz baýyrlar arasynda ádebı, rýhanı, áleýmettik - ekonomıkalyq baılanystardyń san ǵasyrlar boıy úzilmeı kelgendigin atap ótti.
«Ejelden enshisi bólinbegen eki eldiń turmys-salty, ádet-ǵuryptary, tipti talaıly taǵdyry da uqsas keledi. Qart Alataýdyń qos betin mekendegen eki halyq arasynda jyr kóshi de tolastamaǵan. Taýdaı tulǵaly Abaı men Manastyń, kómekeıine boztorǵaı uıa salǵan Toqtaǵul men Jambyldyń, zamanymyzdyń zańǵar bıigine aınalǵan Muhtar men Shyńǵystyń egiz eldiń ádebıetiniń kóshbastaýshylary ǵana emes, rýhanı baýyrlastyqtyń dánekeri retinde de shoqtyǵy bıik turady.
Osy rette, «Qazaq - qyrǵyz bir týǵan» dep, ata-babalarymyz jalǵap ketken altyn kópirdiń irgesin berik ustap, eki el arasyndaǵy dostyqty odan ári nyǵaıtý sizder men bizderdiń basty paryzymyz dep bilemin. Búgingi basqosýymyz da osyny ańǵartady. Endeshe, Syr eliniń bas shaharyna qosh keldińizder», - deı kele, qonaqtarǵa Qyzylorda qalasynyń tarıhy men búgingi jetistikteri týraly qysqasha aıtyp ótti.
12 baptan turatyn memorandýmda eki qala arasynda ınvestıtsııa tartý, kásipkerlik, aýyl sharýashylyǵy, qurylys, qorshaǵan ortany qorǵaý, densaýlyq saqtaý, bilim, mádenıet, sport jáne týrızm sekildi áleýmettik salalar boıynsha yntymaqtastyqty arttyrý máselesi qarastyrylǵan.
Jıyn sońynda, Nurlybek Mashbekuly qonaqtarǵa estelik syılyqtar tabystap, baýyrlas eki eldiń arasyndaǵy iskerlik, áriptestik yntymaqtastyqtyń artýyna septigi mol serpindi jobalardy birlesip júzege asyrýǵa shaqyrdy jáne Qyzylordada alǵashqy ret uıymdastyrylǵan «Aral halyqaralyq turaqty damý forýmyna» atsalysyp, ortaq máselege oı qosýǵa arnaıy kelgenderi úshin alǵys bildirdi.
