Qyzylorda memlekettik-jekeshelik áriptestik jobalar boıynsha aldyńǵy oryndarda keledi
QYZYLORDA. QazAqparat - Qyzylorda oblysy elimiz boıynsha memlekettik-jekeshelik áriptestik jobalardy júzege asyrý baǵytynda aldyńǵy oryndarda keledi. Bul boıynsha óńirler reıtıngisinde Shyǵys Qazaqstan oblysynan keıingi ekinshi orynda tur, dep habarlaıdy QazAqparat tilshisi.
Qazirgi tańda Syr óńirinde 116 memlekettik- jekeshelik áriptestik jobasy júzege asyrylyp otyr. Onyń jalpy quny 34 mlrd teńgeden asady. Olardyń arasynda 38 joba boıynsha 13,8 mlrd teńgeniń kelisimsharty jasalǵan. Bul jobalar ekonomıkanyń barlyq salasynda qolǵa alynǵan. Ásirese, aýyldyq jerlerdegi jobalarǵa basymdyq berilgen. Naqty aıtqanda, jobalardyń jalpy sanynyń 67 paıyzy aýyldyq jerlerge tıesili.
Syr óńirinde memlekettik- jekeshelik áriptestik aıasynda jobalardyń barlyǵy sátti júzege asyrylǵan. Olardyń qatarynda 2017 jyly ashylǵan jańa emhana bar. Emhana bir aýysymda 400 adam qabyldaıdy, onda 43 myń adam úshin dıagnostıka men emdeýdiń jańa ádisterin engizýge múmkindik jasalǵan. Bul joba bir aýysymda 500 adam qabyldaıtyn emhana qurylysy boıynsha kontsessııalyq jobanyń ornyna iske asyryldy. Osylaısha, oblys 3,6 mlrd teńge somasynda bıýdjet qarajatyn únemdedi. Sondaı-aq, 2 jylǵa arnalǵan jobany jedel túrde júzege asty.
Taǵy bir aıta keterligi, «jasyl ekonomıkany» damytý aıasynda birqatar áleýmettik nysandardyń qazandyqtary jańǵyrtyldy. Bıyl tabıǵı gazǵa 31 áleýmettik nysan kóshirý josparlansa, olardyń arasynan 1-i paıdalanýǵa berildi. Sondaı-aq, oblys ortalyǵynyń jaryqtandyrý júıesin jańǵyrtý josparlanýda. Bul rette jekemenshik seriktestikke tólemder nysandarǵa bólinetin qarjy men olardy paıdalanýǵa kózdelgen qarajatty únemdeý esebinen júrgiziledi. Bul óz kezeginde energııa únemdeý rejımine kóshýge múmkindik beredi.
Oblysta jergilikti bıýdjetten qosymsha tólemderdi talap etpeıtin memlekettik- jekeshelik áriptestik jobalaryn júzege asyrýǵa basymdyq berilgen. Olardyń qatarynda oblys ortalyǵynyń qoǵamdyq kólikterine elektrondy bılet ornatý, Qyzylorda qalasynda 730 oryndyq stýdenttik eki jataqhananyń qurylysy jáne Qyzylorda qalasy boıynsha mektep ashanalaryn senimdi basqarýǵa berý jobalary bar.
Oblys ákimi Qyrymbek Kósherbaev bul jóninde «Memlekettik- jekemenshik áriptestik jergilikti bıýdjetke aýyrtpalyqty azaıtý, ınvestıtsııa tartý jáne halyqqa kórsetiletin qyzmetterdiń sapasyn arttyrady. Al ınvestor úshin uzaq merzimge turaqty bıznes ashýǵa múmkindik jasalady» dep atap kórsetken edi.
