Qyzylorda máslıhat depýtattaryn saılaıdy
Atalǵan Saılaýǵa 12226 adam qatysady. Bul týraly Óńirlik kommýnıkatsııalar qyzmetiniń uıymdastyrýymen ótken baspasóz máslıhatynda oblystyq saılaý komıssııasynyń tóraǵasy Abaıbek Júnisov málimdedi.
Máslıhattardaǵy 4 depýtattyq mandatqa 12 kandıdat usynyldy. Úmitkerlerdiń ortasha jasy - 46, eń úlkeni 60-ta, eń jasy 26 jasta. Tirkelgen kandıdattardyń qatarynda 2 mektep dırektory, emdeý mekemesiniń 3 qyzmetkeri, 2 jeke kásipker, 2 muǵalim, 1 memlekettik qyzmetker, 1 saıası partııanyń, 1 qoǵamdyq birlestiktiń ókili bar. Saılaýdy uıymdastyrýǵa oblystyq, 3 aýdandyq aýmaqtyq, 4 aýdandyq okrýgtik jáne 7 ýchaskelik saılaý komıssııalary atsalysady.
Aýdandyq máslıhattardyń depýtattyǵyna kandıdattardy tirkeýdiń merzimi 4 qazanda aıaqtalady. 5 qazannan bastap kandıdattar saılaýaldy úgit jumystaryna kirisedi.
«Oblystaǵy saılaýǵa respýblıkalyq bıýdjetten árbir kandıdattyń teledıdardan 15 mınýt sóz sóıleýine, radıodan 10 mınýt sóz sóıleýine, sondaı-aq baspa basylymdarynda 0,1 baspa tabaqtan aspaıtyn kólemde eki maqala jarııalanýyna teń mólsherde 153000 teńgeden qarajat bólingen. Saılaýǵa ázirlik kezeńi ishinde saılaý komıssııalaryna saılaý zańnamasynyń buzylýy týraly ótinishter kelip túsken joq», - dedi oblystyq saılaý komıssııasynyń tóraǵasy Abaıbek Júnisov.
Aıta ketý kerek, memleketimizde máslıhat saılaýlary, ózin-ózi basqarý tetikteri jetildirý ústinde. Bul Elbasynyń «Ult jospary - bes ınstıtýtsıonaldyq reformany júzege asyrý jónindegi 100 naqty qadam» eńbeginde de naqty kórinis tapqan. Onyń 97-qadamynda: ózin-ózi retteý men jergilikti ózin-ózi basqarýdy damytý arqyly azamattardyń sheshimder qabyldaý úderisine qatysý múmkindigin keńeıtý máselesi aıtylǵan. Sonymen birge memleketke tán emes qyzmetterdi básekelestik ortaǵa jáne ózin-ózi retteýshi uıymdarǵa berý jaıy kóterilgen bolatyn.
