«Qyzylorda qyzylsýdyń astynda qalmasyn...» - respýblıkalyq basylymdarǵa sholý
ASTANA. Qarashanyń 17-si. / QazAqparat/ - Qazaq aqparat agenttigi respýblıkalyq basylymdarda qarashanyń 17-si, seısenbi kúni shyqqan ózekti materıaldarǵa sholýdy usynady.
Keshe Aqordada Memleket basshysy Nursultan Nazarbaevtyń tóraǵalyǵymen elimizde qarjy sektoryn damytý máseleleri jónindegi keńes bolyp ótti. Keńeste aldaǵy ýaqytta elimizdiń qarjy salasyn damytý jáne Daǵdarystan keıingi kezeńde Qazaqstannyń qarjy sektoryn damytý tujyrymdamasy talqylandy. «Egemen Qazaqstan» basylymynyń búgingi sanyndaǵy «Qarjy sektoryna qalyptylyq qajet» degen taqyryppen berilgen maqala atalmysh otyrysqa egjeı-tegjeıli toqtalypty.
Memleket basshysy Ulttyq bankke naqty jáne qarjy aktıvteri naryǵyndaǵy teńgerimsizdik pen «kópirshikterdiń» paıda bolýynyń aldyn kúni buryn alý jáne boldyrmaýdyń ońtaıly tetikterin jasaýdy, sondaı-aq ekonomıkanyń qarjy sektorynyń júıeli táýekelderin meıilinshe azaıtýdy tapsyrdy, dep jazǵan «Kazahstanskaıa pravda» gazeti «Tujyrymdama daǵdarystan keıingi damýymyzdy qalaı qarjylandyramyz» degen saýalǵa naqty jaýap berýi tıis», degen Elbasynyń sózin keltirgen.
Osy taqyryptaǵy maqalany «Lıter», «Vremıa», «Aıqyn» gazetiniń búgingi sanynan da oqýǵ bolady.
Premer-Mınıstr Kárim Másimov bir kúndik jumys saparymen ótken senbi kúni Pavlodar oblysynda boldy. Úkimet basshysy óndiristi óńirge kelgen saparyn oblys ortalyǵyna qarasty Kenjekól aýyly mańynda ornalasqan jetim jáne ata-anasynyń qamqorlyǵynsyz qalǵan balalarǵa arnalǵan otbasy úlgisindegi balalar aýyly kesheninen bastady. Tolyǵyraq «Egemen Qazaqstan» gazetiniń búgingi sanyndaǵy «El damýyn óndirister úlesi aıqyndaıdy» degen maqaladan oqı alasyzdar.
«Ómirde miz baqpaıtyn qoǵamdyq júıeden ábden kóńili qalǵan, kúıip-pisip ádilet izdeýden, basqanyń qaıǵysyn bıt shaqqandaı kórmeıtin basshysymaqtardan túńilgen adam aqyrynda ózi de solaı bolyp ketedi», deıdi poezııa padıshasy Farıza apamyz. Atalmysh basylymnyń búgingi sanynda jaryq kórgen «Óz halqyńdy súıý- kópirme sóz emes, oǵan degen janashyrlyq» taqyrybyndaǵy suhbatta aqberen aqyn Farıza ózekti taqyryptarǵa oı órbitedi.
***
Ońtústik Qazaqstan oblysy Túrkisten qalalyq ákimdigine qarasty Iqan aýylyndaǵy maqta zaýyty órtenip ketti. «Aıqyn» gazetiniń búgingi sanyndaǵy « 700 tonna maqta órtenip ketti» degen taqyryptaǵy maqala osy keleńsiz jaǵdaıdy egjeı-tegjeıli jazypty.
«Kıno - ulttyq bolmysty tárbıeleıtin jáne nasıhattaıtyn ıdeologııalyq qural, rýhanı baılyq. Jasyratyny joq, qalyń qazaq kórermenderi talaı jyldan beri kıno mamandaryna ókpeli», - dep jazǵan «Aıqyn» basylymynyń búgingi sanyndaǵy kelesi maqala «Adasqandar» - qoǵamnyń qasireti» degen taqyryppen qazaq kıno salasyndaǵy ózekti máselelerge toqtalypty.
***
«Ázirge qala turǵyndary úshin tumaý keler qaýip bolmaǵanmen, jedel respıratorly-vırýsty indet irgemizde júr», - dep jazǵan «Astana aqshamy» basylymynyń búgingi sanyndaǵy maqala «Aýyrmaıtyn jol izde» degen taqyryppen qorqynyshty A/H1N1 tumaýynan saqtanýǵa shaqyrypty.
«Tolaǵaıdyń túpnusqasy (prototıpi) Ábdilda aqynnyń ózindeı kórinedi. Rasynda rýhymyzdy óshirgisi kelgen barlyq qasiretimizdiń qasynda, barlyq rýhanı jańarýymyzdyń basynda bolǵan Ábdilda Tájibaıuly - Jyr-Tolaǵaıymyz!». Osylaı oı terbegen atalmysh basylymdaǵy Qulbek Ergóbektiń maqalasy «Jyr -tolaǵaı» degen taqyryppen berilgen.
***
«Qyzylorda qyzylsýdyń astynda qalmasyn...». Osy taqyryppen berilgen «Alash aınasy» gazetiniń búgingi sanyndaǵy maqala qyzylordalyqtardy alańdatyp otyrǵan ózekti máselege toqtalypty.
«Qazirgi kúni Naryn-Syrdarııa alabynda sý deńgeıi kóterilip tur. Osy kúnderi onda 20 mlrd 539 mln tekshe metr sý bar. Ol byltyrǵy jyldyń dál osy kezeńindegiden edáýir artyq. Qysqy mezgilde «Shardara» sý qoımasyna joǵary jaqtan 14 mlrd tekshe metr shamasynda sý keledi dep boljanyp otyr. Al sý qoımasynyń syıymdylyǵy bar bolǵany 5 mlrd tekshe metr. Ázirge atalǵan orynda 1,6 mlrd tekshe metr sý jınalǵan. Oǵan quıylǵan sý kúnnen-kúnge kóbeıe túsken. Qytymyr qys qyr astyna kelgende qyzylordalyqtar darııa deńgeıine alańdaıdy»,- deıdi basylym.
«Ustanymy dúdamal dinı toptar tarapynan azamattar quqyǵyna nuqsan keltirip jatatyn oqıǵalar - jıi oryn alatyn qubylys. Azamattardyń dúnıe tanymyna teris baǵyt berip, jeke ómirine qol suǵyp, múlkinen aıyryp, keıde tipti adamnyń eń qymbat baılyǵy - shybyn janyn qurbandyqqa shalǵan oqıǵalar da quqyq qorǵaý organdarynyń tirkeýinde az emes. Endeshe bizdiń maqsatymyz osyndaı keleńsizdikterge jeteleıtin dinı toptardyń qaýpinen qutqarýdyń jolyn izdeý edi»,-dep jazǵan atalmysh basylymdaǵy kelesi maqala «Qazir álemdegi dinderdiń sany, baǵyttary, olardyń tarmaqtalýy óte keń aýqymda kórinis berip otyr» degen taqyryppen berilgen.
Qazaq halqynyń tuńǵysh kásibı músinshisi - Hakimjan Naýryzbaev ekenin bireý bilse, endi biri bile bermeıdi. Qazaq músin óneriniń negizin qalaǵan tulǵanyń qolynan shyqqan kópshilikke eń tanymal týyndylary - Abaı, Jambyl, Shoqan, Amangeldi, Qurmanǵazy, Dına eskerkishteri bar. Birtýar azamat Hakimjan Naýryzbaev týraly bilgińiz kelse, «Alash aınasynyń» búgingi sanyndaǵy «Qazaqtan shyqqan tuńǵysh kásibı músinshi» taqyrybyndaǵy maqalaǵa kóz júgirtińiz.
Qorshaǵan ortany qorǵaý mınıstri Nurǵalı Áshimovtyń aıtýynsha, elimizde 22 mıllıard tonna túrli qaldyqtar jınalyp qalǵan, sonyń tórtten biri ýly. Bul problemany sheshý úshin óndiris pen tutynystyń qaldyqtaryn keshendi basqarý jónindegi ortalyq, «Jasyl damý ortalyǵy» dep atalatyn jańa kásiporyn qurý josparlanýda. Bul týrasynda «Ekspress K» gazeti habarlaıdy.
«Úkimet Basshysy Kárim Másimov Elbasynyń tikeleı jelidegi suqbatyna kelip túsken suraqtar boıynsha jaýapty memlekettik organdar qarashanyń 18-inen jeltoqsannyń 10-yna deıingi aralyqta berýleri tıis», deıdi «Lıter» basylymy. Premer-mınıstrdiń osy jáne janar-jaǵar maı naryǵyndaǵy, sondaı-aq ózge de máselelerdi sheshý turǵysyndaǵy tapsyrmalary týraly materıaldy «Ekspress K», «Izvestııa-Kazahstan» basylymdarynan da tolyq oqýǵa bolady.
