«Qyzylorda-Qumkól» trassasynda jol apatyna ushyraǵandarǵa qoldaý kórsetiledi - Qýanyshbek Ysqaqov
QYZYLORDA. QazAqparat - Qyzylorda oblysynyń ákimi Qýanyshbek Ysqaqov «Qyzylorda-Qumkól» avtojolynda bolǵan jol-kólik oqıǵasy saldarynan zardap shekken azamattardyń jaǵdaıyn bilý úshin oblystyq medıtsına ortalyǵy men qalalyq aýrýhanaǵa bardy, dep habarlaıdy QazAqparat tilshisi.
Oblys ákimimen birge emdeý oryndaryna qala ákimi men oblystyq máslıhat hatshysy, «Nur Otan» partııasy oblystyq fılıaly tóraǵasynyń birinshi orynbasary jáne oblys ákiminiń orynbasarlary bardy.
Oblys ákimi Qýanyshbek Ysqaqov jol-kólik oqıǵasy saldarynan oblystyq medıtsına ortalyǵy men qalalyq aýrýhanada em alyp jatqan naýqastardyń jaǵdaıyn bildi. Oblystyń kópbeıindi aýrýhanasyna 17 azamat túrli dene jaraqatymen jetkizilgen. Onyń ishinde 6 adam jansaqtaý bólimine ornalastyryldy. Al 5 adamǵa qajetti em sharalary kórsetilip, úıine qaıtarylǵan. Qalalyq aýrýhanaǵa 4 adam jetkizilip, onyń 2-i jansaqtaý bóliminde. Qazir olarǵa tıisti medıtsınalyq kómek kórsetilýde, qajetti dári-dármekpen tolyq qamtamasyz etilgen.
Aıta ketý kerek, oqıǵa ornyna der kezinde tótenshe jaǵdaılar departmenti, jol-patrýldik qyzmeti, medıtsınalyq ortalyq, jedel járdem jáne sanıtarlyq avıatsııa qyzmetkerleri men qajetti tehnıka jumyldyryldy.
Sondaı-aq, oblys ákimi quqyq buzýshylyq profılaktıkasy jónindegi vedomstvoaralyq komıssııanyń kezekten tys jedel otyrysyn ótkizip, tıisti sala basshylaryna tapsyrma berdi.
«Sońǵy bolǵan jol-kólik oqıǵasyna Memleket basshysy Qasym-Jomart Toqaev nazar aýdaryp, polıtsııa men jergilikti atqarýshy organdardyń quqyq buzýshylyq profılaktıkasy jumystaryna qatysty eskertý aıtty. Oblystyq polıtsııa departamenti tarapynan berilgen usynystarǵa barynsha qoldaý kórsetilip keledi. Tıisti qarjy bólinip, materıaldyq-tehnıkalyq baza jyl saıyn jańartylýda. Alaıda, odan nátıje joq. Jumys osy deńgeıde qalatyn bolsa, QR Іshki ister mınstrligine oblystyq polıtsııa departamenti jaýapty basshylarynyń atqaryp otyrǵan laýazymdaryna sáıkestigi jóninde usynys beretin bolamyn», - dedi oblys ákimi quqyq buzýshylyq profılaktıkasy jónindegi vedomstvoaralyq komıssııanyń kezekten tys jedel otyrysynda.
Sondaı-aq, aımaq basshysy kólik apatynan qaza tapqan azamattardyń jaqyndaryna kóńil aıtyp, Túrkistan oblysy men Shymkent qalasynyń ákimderine jedelhat joldady.
«Jaraqat alǵan azamattarǵa bizdiń tarapymyzdan qajetti kómek kórsetiletin bolady. Emdeý sharalary tolyqtaı jasalady. Emdelýshilerdiń tez saýyǵyp, otbasyna aman-esen oralýyna tilektespin» - dedi oblys ákimi.
