Qyzylorda kórkemsýret galereıasyna Salıhıtdın Aıtbaevtyń esimi berildi

QYZYLORDA. QazAqparat - Qyzylorda kórkemsýret galereıasyna belgili sýretshi Salıhıtdın Aıtbaevtyń esimi berildi, dep habarlaıdy QazAqparat tilshisi.

Qyzylordada 13-25 maýsym aralyǵynda Reseı, Ózbekstan, Qyrǵyzstan jáne Qazaqstan qylqalam sheberleriniń qatysýymen uıymdastyrylǵan «Aǵa urpaq óneri - jastarǵa amanat» ataýymen qylqalam sheberleriniń halyqaralyq sımpozıýmy ótti.

Bul shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalyq maqalalary aıasynda júzege asyryldy.

Kórkemsýret galereıasyna Salıhıtdın Aıtbaevtyń esimi berilý saltanatyna oraı ótkizilgen sharaǵa qatysqan Qyzylorda oblysynyń ákimi Qyrymbek Kósherbaev sımpozıým qatysýshylaryn quttyqtap, olarǵa alǵys hat tabystady. Sondaı-aq, aımaq basshysy kórkemsýret galereıasy Salıhıtdın Aıtbaevtyń esimimen atalatynyn málimdedi.

«Qyzylorda qalasy - qaımaǵy buzylmaǵan qalyń qazaqtyń, túbi bir túrki mádenıetiniń altyn kómbesi, Qazaq Respýblıkasynyń tuńǵysh astanasy. Bul jerde san túrli óner týyndylary kóptep kezdesedi. Salıhıtdın Aıtbaev atyndaǵy kórkemsýret galereıasynyń qory óner týyndylaryna tola bersin», - dedi aımaq basshysy.

Sonymen qatar, oblys ákimi sýretshi Salıhıtdın Aıtbaevtyń jubaıy Lázzat Qojabekovany quttyqtady. Óz kezeginde, halyqaralyq sımpozıýmnyń ónertanýshy, Qazaqstan Respýblıkasy sýretshiler keńesiniń hatshysy Jambyl Nátbaev oblys ákimine qoldaý kórsetkeni úshin alǵysyn bildirip, oǵan sımpozıýmǵa qatysýshylardyń qolynan shyqqan shyǵarmany tabys etti.

Odan keıin kelýshiler Salıhıtdın Aıtbaevtyń shyǵarmashylyǵyna arnalǵan kórmemen tanysty.

S.Aıtbaev (1938-1994) - keskindemeshi, sýretshi, Qazaqstannyń eńbek sińirgen óner qaıratkeri, Lenın komsomoly syılyǵynyń laýreaty, KSRO Sýretshiler Odaǵynyń múshesi. Onyń «Shopandar demalysy», «Baqyt» kartınalary qazaq beıneleý ónerine erekshe kórinis beredi. «Á.Álimjanov», «Ana», «Áke», «Shopan», «Abaı» portretterin, ortaǵasyrlyq Hıvanyń sáýlet eskertkishterine arnalǵan jumystar serııasyn jazdy. S.Aıtbaevtyń shyǵarmalary Á. Qasteev atyndaǵy QR Memlekettik óner murajaıynda jáne qazirgi zamanaýı óner murajaıynda saqtalýda.