Qyzylorda-Kókshetaý: Jolserikter bıletsiz mingizgeni úshin qansha aqsha alady

ASTANA. QazAqparat - Arnaıy baqylaýshylar toby jolaýshylar tasymaly salasyndaǵy zańsyz áreketterdi anyqtady. Atap aıtqanda, birqatar poezdardyń jolserikteri bıletsiz jolaýshylardy mingizgeni úshin ashyq túrde aqsha suraǵan. Sonyń bári beınekameraǵa jazyldy, dep habarlaıdy QazAqparat tilshisi QR Memlekettik qyzmet isteri jáne sybaılas jemqorlyqqa qarsy kúres agenttiginiń Aqmola oblystyq departamentine silteme jasap.

Vıdeoda departament mamandary aldymen «Kókshetaý - Qyzylorda» baǵytyndaǵy poezdyń jolserigine jolyǵyp, bıletsiz astyńǵy oryndy taýyp berýin suraıdy.

«12 myńnan bar. Eger soǵan neǵylamyn deseń, qazir jatqannan Shymkentke deıin jatasyz. Kýpeniń ishinde astyńǵy oryn. Maǵan aqshany berip ketesiń. Men jatqyzyp ketemin. Ózim 7-shi vagonda bolamyn», - deıdi Kúlán esimdi jolserik.

Osydan keıin baqylaýshylar «Petropavl-Almaty» baǵytyndaǵy júrdek poezdyń jolserigine jolyqty. Ol da aqshaǵa jetkizip berýge kelisti. Al «Kókshetaý-Qyzylorda» poezynyń jolserigi jatqyzatyn orynǵa deıin kórsetip berdi.

«10 bolady. Júr, kórseteıin. Meniń kýpem. Basqa oryn joq qoı. 8 myńǵa mynany beremin. Ol - úshinshi «polka». Al ekinshi «polka» 12 myńǵa ketip qalady», - deıdi jolserik. Kókshetaý vokzalyndaǵy deldaldar da kameraǵa túsip qaldy.