Qyzylorda qarqyndy damyp kele jatqan óńirler bestigine kirdi
QYZYLORDA. QazAqparat - Qyzylorda oblysy elimizdegi qarqyndy damyp kele jatqan óńirlerdiń úzdik bestigine kirdi dep habarlaıdy QazAqparat tilshisi ákimdiktiń baspasóz qyzmetine silteme jasap.
Tuńǵysh Prezıdent - Elbasy 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda «Ekonomıkasy qarqyndy damyp kele jatqan zamanaýı progressıvti memleket quryp, beıbitshilik pen qoǵamdyq kelisimdi qamtamasyz ettik», - dep atap kórsetti.
Syr óńirinde mundaı oń ózgeris sońǵy alty jylda munaı men gaz kóleminiń tómendeýine qaramastan óz nátıjesin berdi. Aımaqta óńdeý ónerkásibiniń damý qarqyny, ekonomıkaǵa ınvestıtsııa tartý, qurylys jumystarynyń kólemi jáne turǵyn úıdi paıdalanýǵa berý boıynsha aımaqtyń ósý kórsetkishi elimizdegi ortasha kórsetkishten joǵary bolyp tur.
Elimizdiń ulttyq ekonomıka mınıstrliginiń málimetine sáıkes, Qyzylorda oblysy óńdeý ónerkásibiniń ósý qarqyny, ekonomıkaǵa ınvestıtsııa tartý, qurylys jumystary men turǵyn úıdi paıdalanýǵa berý boıynsha kóshbasshylar qatarynda keledi.
«Bıylǵy І toqsanda negizgi kapıtalǵa salynǵan ınvestıtsııa 84 mlrd teńgeni qurady. Ol ótken jyldyń esepti kezeńimen salystyrǵanda 2,3 esege artty. Ol - respýblıka boıynsha eń úzdik kórsetkish. Jalpy, sońǵy 6 jylda óńdeý ónerkásibi óniminiń óndiris kólemi 71% artty. Bul kórsetkish respýblıka boıynsha esepti kezeńde ortasha eseppen 16,2% quraıdy», - dedi Qyzylorda oblysynyń ındýstrııalyq-ınnovatsııalyq damý basqarmasynyń basshysy Rınat Sultangereev.
Óńdeý ónerkásibine tartylǵan ınvestıtsııa kólemi 4,1 mlrd teńgeni qurap, ótken jyldyń sáıkes kezeńimen salystyrǵanda 2,3 esege ósti.
