Qyzylorda qalasynyń bas josparyna túzetýler engizilmek

Atalmysh bas jospar 2009 jylǵy 17 shildede bekitilgen edi. Oǵan ózgerister engizý oblys ákimi Qyrymbek Kósherbaevtyń tóraǵalyǵymen ótken Qyzylorda qalasynyń ınfraqurylymyn damytý máseleleri boıynsha májilisinde eksheldi. Sońǵy 5 jylda oblys ortalyǵynyń damý jaǵdaıy birshama ósti. Qalada eńseli ǵımarattar el ıgiligine berildi. Qyzylordadan Jezqazǵan baǵytyna qaraı jol boıynda jeke turǵyn úı qurylysyna arnalǵan jańa aımaq ashyldy. Syrdarııa ózeniniń Qyzylorda qalasy tusyndaǵy sol jaǵalaýynda jańa ǵımarattar boı kóterip, ol aımaqty ıgerý sharalary qolǵa alyndy. Endigi maqsat - aldaǵy bes jyldyqtyń damý jaǵdaıyn naqty aıqyndaý bolyp otyr. Osyǵan oraı Qyzylorda qalasynyń bas josparyna túzetýler engizý josparlanýda. Bul jumystarmen tájirıbesi mol «Ýrbostıl» mekemesi aınalysyp keledi.

Mamandar qala shekarasynda Tasbóget pen Qyzyljarma eldi mekenderine qatysty ózgertýler bolýy tıis ekenin aıtady. Qyzylorda soltústik bóligine, Qumkól baǵytyna qaraı damı bastady. Osyǵan oraı qala aýmaǵy da ósip otyr. Bas jospardyń alǵashqy kezeńinde oblys ortalyǵynyń aýmaǵy 11 myń gektar edi. Qazir ol 19960 gektarǵa jetken. Bas jospardyń ekinshi kezeńi 2025 jylǵa eseptelgen. Buǵan ózgeris engizilgennen keıin ol qalalyq jáne oblystyq máslıhattarda talqylaýdan jáne memlekettik saraptamadan ótkiziledi. Sodan keıin Úkimet nazaryna usynylady.

Qyrymbek Kósherbaev jıyn barysynda qala basshylyǵyna Qyzylordanyń irgesinde turǵan «Sabalaq» saıajaı keshenin qala aýmaǵyna engizý jóninde naqty tapsyrma berdi. Máslıhat sheshimimen bul aýmaq qala quramyna engizilgennen keıin ol jerdiń damýyna qarjy bólýge bolady.

«Turǵyndar úshin ınjenerlik-kommýnıkatsııalyq ınfraqurylym mańyzdylyǵy jaǵynan basty másele bolyp otyr. Bizge kósheni jaryqtandyrý, joldar jáne trotýar tóseý jáne ózge de máseleler boıynsha turǵyndar tarapynan saýaldar jıi túsip jatady. Qyzylordalyqtar jaıly ómir súrýi úshin sapaly jabdyqtalǵan ınjenerlik ınfraqurylymdy talap etedi», - dedi oblys ákimi.

Bul oraıda aglomeratsııa men ınfraqurylymnyń jaıylyp ketpeýine nazar aýdarylady. Qala aýmaǵy tıimdi paıdalanylýy tıis. Búginde Qyzylorda qalasynda 294 myń adam turady. Jeke turǵyn úı salý úshin jer ýchaskesin alýǵa 60 myńǵa jýyq adam kezekte tur.

Oblys ákimi qalanyń keńistikte damýyna nazar aýdarý qajettigine toqtaldy. Mundaı kórinisti qazir sol jaǵalaýda salynyp jatqan ǵımarattardan baıqaýǵa bolady. Sondaı-aq, qalada buryn turǵyn úıler salýda birkelkilik ańǵarylady. Ol burynǵy keńestik kezeńnen qalǵan jattandy kórinis ekeni belgili. Sondyqtan turǵyn úılerdiń syrtqy beınesinde árkelkilik qajet.

Jıyn barysynda ózge de máseleler talqylandy. Oblys ákimi bul oraıda tıisti sala basshylaryna naqty mindetter júktedi.

foto:kyzylorda.gov.kz