Qyzylorda qalasynyń ákimi membaǵdarlamalardyń aýyldarda oryndalýyn tekserdi
Shahar basshysy eń aldymen, «Aýyl – el besigi» respýblıkalyq baǵdarlamasy aıasynda qarjylaı qoldaý tapqan Aqsýat aýyldyq okrýgindegi №143 orta mekteptiń kúrdeli jóndeý jumystarynyń sapasyn tekserdi. 1982 jyly salynǵan mektep araǵa 38 jyl salyp, kúrdeli jóndeýden ótýde. Aýyldyń jumyssyz júrgen 40 azamaty qurylysqa jumyldyrylǵan. Qala ákimi kúrdeli jóndeýdiń ishki jumystarynan olqylyqtardy anyqtap, kelisim shartty qaıta zerdeleýdi jaýapty sala basshylaryna tapsyrdy.
Munan keıin qala ákimi aýyl ortalyǵynda bolyp, buǵan deıin jóndeý kórmegen Ú.Toqmaǵambetova kóshesindegi asfalt tóseý jumystaryn kórdi.
«Kúz bolsa batpaqtap, qatynas qıyn bolýshy edi. Jaqsy jańalyqty estip, taqtaıdaı tegis jolǵa jetetinimizge qýanǵan bolatynbyz. Endi, mine, ıgi istiń kýágeri bolyp turmyz», - degen aýyl turǵyny Bodyqov Beısenbaı aqsýattyqtardyń atynan alǵysyn jetkizdi.
Aıta ketý kerek, bıyl Aqsýatta 16 kóshe «Aýyl – el besigi» respýblıkalyq baǵdarlamasy boıynsha ortasha jóndeýden ótpek. Onyń 7 kóshesine asfalt salynsa, qalǵan 9 kóshege qıyrshyq tas tóseledi. Munan bólek, taǵy bir kóshege qıyrshyq tas tóseý jumystary «Óńirlerdi damytýdyń 2020-2025 jyldarǵa deıingi baǵdarlamasy» sheńberinde júzege asýda. Al jergilikti bıýdjet esebinen 1 kóshege tas tóseý jáne turǵyndar úshin aýyl ortalyǵyna sporttyq kóshe trenajerin ornatýǵa qarjy bólingen. Sonymen qatar, ótken jyly kúrdeli jóndeýden ótken «Asyl-Aı» bóbekjaı – baqshasyna qajetti jabdyqtar alýǵa oblystyq bıýdjetten qarjy qaralyp, jumystar júrgizilýde.
«Aýyl - el besigi» dep aty aıtyp turǵandaı baǵdarlama aqsýattyqtar úshin tıimdi bolyp tur. Buǵan deıin ambýlatorııa, mádenıet úıi jańadan salynyp, endi mine mektep kúrdeli jóndeýden ótýde. Mundaǵy qurylys qarqynyn, jumys barysyn bastalǵaly beri baqylaýda ustap otyrmyz. Aldaǵy ýaqytta da únemi qadaǵalaýda ustaımyz degen qala ákimi keıde joba aıaqtalǵannan keıin sapaǵa qatysty máseleler týyndap jatatynyn aıtty. Sondaı olqylyqtardy boldyrmaı, aldyn-alý maqsatynda aýyldyń ardagerler keńesi men turǵyndar jumys barysyn baqylaı alatynyn jetkizdi. Aýyl ákimine barlyq jumysty saralap, joldy laboratorııalyq tekseristen ótkizip baryp, qabyldaýdy tapsyrdy.
Sonymen birge, baǵdarsham, jaryq baǵanalary, jaıaý júrginshi joldaryna qajetti qurylys zattaryn tıimdi paıdalanyp, aýyldyń qajettiligine jaratý kerektigin jetkizdi.
Aqsýat aýylyna qarasty Naýryz saıajaıy úshin bıyl jaǵymdy jańalyqtyń biri aýyz sý jınaý qoımasynyń qurylysy aıaqtalyp, turǵyndar tolyq sý júıesine qosyldy. «Sý qoımasy osy ýaqytqa deıin sýdy syrttan tasyp iship, tirshilik kózinen tapshylyq kórgen saıajaı turǵyndarynyń turmysyn jeńildetti». Bul 8 jyldan beri osy saıajaıda turyp jatqan Maqpal Shahkozavanyń pikiri. Turǵyn aýyz sýdyń sapasy kóńilden shyǵatynyn da jasyrmady. «Óńirlerdi damytý 2020» baǵdarlamasy aıasynda júzege asqan aýyz sý jınaý qoımasyn «Melıorator» seriktestigi saldy.
Aralaý jumystary Aqjarma aýyldyq okrýginde jalǵasty. Mundaǵy 1983 jyly irgetasy qalanǵan 100 oryndyq «Oblystyq narkologııa ortalyǵyna» qarasty medıtsınalyq bólimsheni qaıta qalpyna keltirý jumystaryna «Bolashaq Interneıshn Development» JShS jaýapty. Qala ákimi jaýapty mekemeniń jumysy qadaǵalaýda bolatynyn eskertip, nysandaǵy jóndeý jumystary qazan aıynyń basynda aıaqtalsyn degen tapsyrma berdi.
Aqjarma aýyldyq okrýginde bıyl jol máselesi tolyǵymen sheshiledi. Eldi-mekendegi Toǵaı kóshesinde buǵan deıin asfalt bolmaǵan. Mundaǵy jol jóndeý jumystaryn shahar basshysy ózi arnaıy tekserip, qalǵan eki-úsh kósheniń qurylysyn osy jyly aıaqtaýdy sala basshylaryna nyqtap tapsyrdy. Aýyl ortalyǵynda budan bólek jergilikti bıýdjetten sporttyq kóshe trenajerin, jaryq baǵanalaryn ornatýǵa qarjy bólinip, joba sátti aıaqtalyp, paıdalanaýǵa berildi. Qazirgi tańda Aqjarma aýyldyq okrýginde 6 kóshege, onyń ishinde jergilikti bıýdjet esebinen 1, «Jumyspen qamtý jol kartasy» baǵdarlamasyna saı 5 kóshege ortasha jóndeý jumystary júrgizilýde.
Aıta ketý kerek, búgingi tańda «Jumyspen qamtý jol kartasy» baǵdarlamasy aıasynda Qyzylorda qalasy boıynsha barlyǵy 1850 adam jumyspen qamtylǵan. Onyń 1271 jumyspen qamtý ortalyǵy arqyly joldanǵan azamattar.
