Qyzylorda qalasynyń ákimi 200-ge jýyq anaǵa dastarhan jaıyp, qurmet kórsetti
QYZYLORDA. QazAóparat - Qyzylordada qala ákimi Nurlybek Nálibaevtyń qatysýymen 8 naýryz - Halyqaralyq áıelder kúni merekesine oraı «Astana» meıramhanasynda merekelik saltanatty shara ótti, - dep habarlady QazAqparat HAA tilshisi.
Merekelik sharaǵa 200-ge jýyq názik jandylar qatystyryldy.
Olardyń ishinde Uly Otan soǵysynyń ardageri, Eńbek ardagerleri, batyr analar, bilim, sport jáne mádenıet salasynyń úzdikteri, ulttyq-mádenı ortalyqtardyń músheleri, jýrnalıster men quqyq qorǵaý salasynyń qyzmetkerleri, úkimettik emes uıym ókilderi, bilim berý mekemeleri sekildi ár túrli salada jemisti eńbek etip júrgen qyz-kelinshekter bar.
Shara barysynda qala ákimi N.Nálibaev: «Jyl mezgiliniń eń ǵajaıyp kezeńi, kóktemniń shuǵylaly shýaqty kúninde Sizderdi jáne Sizder arqyly barsha analarymyz ben arýlardy tól merekelerińiz - Halyqaralyq áıelder kúnimen shyn júrekten quttyqtaımyn», - dep, tilegin jetkizdi.
Munan ári ol: «Sizderge qurmetimiz sheksiz. Bul biz úshin analarymyzdyń aldyndaǵy perzenttik paryzymyz, jalpy názik jandylardyń aldynda er azamat retinde mindetimiz dep bilemin. Anasyn asylym dep sanaıtyn, apa - jeńgelerin qymbatyna balaıtyn, qaryndasyn qarlyǵashym dep qadirleıtin, ómiriniń qosaǵy - súıikti jary men tátti seziminiń jemisi óz qyzyn janyndaı jaqsy kóretin erler qaýymynyń barlyǵyna ortaq sezim bul.
«Otan - otbasynan bastalady», sondyqtan da otbasy men qoǵam júgin qaıyspaı kóterip júrgen Sizderdiń bul eńbekterińiz árdaıym qurmetke laıyq.
Sizderge degen qurmetimiz, barlyq ystyq yqylasymyz ben iltıpatymyz tek mereke kúnderi ǵana emes, máńgilik maqsatymyz jáne turaqty ustanymymyz bolyp qala bermek», - dedi.
Óz kezeginde, saltanatty sharaǵa qatysqan aq jaýlyqty analar men qyz-kelinshekter Syr óńiriniń bas shahary - Qyzylorda qalasynda sońǵy jyldary atqarylǵan aýqymdy jumystardyń arqasynda, óńirimizde oryn alǵan oń ózresiterge toqtalyp, osy maqsatta qyzmet etip júrgen barsha azamattarǵa alǵystary men analyq aq tilekterin jetkizip jatty.
Saltanatty jıyn barysynda jergilikti ónerpazdar barsha qatysýshylarǵa merekelik kóńil-kúı syılasa, búldirshinder de aıaýly jandarǵa ásem ánderin arnady.
Qatysýshylardyń barlyǵyna qala ákimi arnaıy syılyqtar men gúl shoqtaryn tabystady.
