Qyzylorda qalasyndaǵy saılaýshylar daýysyn qabyldaý №185-shi saılaý ýchaskesinde qyzý júrip jatyr
QYZYLORDA. 3 sáýir. QazAqparat /Jańagúl Serdaly/ - Qyzylorda qalasynda QR Prezıdentiniń kezekten tys saılaýyna qatysyp jatqan saılaýshylar daýysyn qabyldaý M.Mámetova atyndaǵy gýmanıtarlyq kolledjde ornalasqan №185-shi saılaý ýchaskesinde de qarqyndy júrýde.
Bul saılaý ýchaskesinde 1966 saılaýshy tirkelgen. El erteńi úshin mańyzdy sharaǵa qatysýǵa árbir saılaýshy múddeli. Saılaý ýchaskesi tóraǵasynyń aıtýynsha, saılaýshylardyń qatysý belsendiligi joǵary.
Daýys berý dál osy qarqynmen júrse, belgilengen ýaqytqa jetpeı-aq, bul jerdiń saılaýshylary tolyqtaı óz daýysyn berip bolady.
Saılaýǵa qatysýshylardyń qatarynda óńirdiń órkendeýine eleýli úles qosyp júrgen azamat, oblystyq máslıhat depýtaty Sámıt Daldabaev ta bar.
Sámıt Daldabaev - oblystyq máslıhat depýtaty:
- Bıylǵy kezekten tys prezıdenttik saılaýdyń óz erekshelikteri bar. Sonyń bastysy, qoǵam úshin mańyzdy shara el táýelsizdiginiń 20 jyldyǵymen tuspa-tus kelip otyr. Demek, bul saılaý el tarıhynda eleýli oryn alyp qalary sózsiz.
