Qyzylorda qalasyndaǵy kóptegen oryndar kórkeıe tústi
Oblys ortalyǵynda 2020-2021 jyldarǵa arnalǵan «Jumyspen qamtýdyń jol kartasy» aıasynda «Taǵzym alańy», «Syr Ana» monýmenti, «Temir jol parki» jáne Nazarbaev dańǵylyn abattandyrý jumystary qolǵa alynǵan.
«Temirjol» saıabaǵynda «Iman» JShS jóndeý jumysyn júrgizýde. Munda qala turǵyndary endi voleıbol men basketbol alańdarynda bos ýaqytyn tıimdi ótkize alady. Oǵan qosa retro sahnanyń boıynda sýburqaq ornatylǵan. Saıabaq joldary jańalanyp, oǵan tas tóseýish tóseledi. Nysan qyrkúıek aıynyń aıaǵynda paıdalanýǵa beriledi dep josparlanyp otyr.
Sondaı-aq, «Taǵzym alańy» aýmaǵyndaǵy qaıta jańǵyrtý men abattandyrý sharalary da kópshilik kóńilinen shyǵýda. Qazirgi ýaqytta alańnyń 6 sharshy metrge jýyq aýmaǵyna túrli-tústi tas tóseýishter qoıyldy. Demalýshylar úshin 30 oryndyq ornatylady, nysannyń belgili bir bóligi temir qorshaýmen qorshalady. Bul jumystarǵa «Asanas-Dar» JShS merdiger bolyp tanylǵan. Seriktestik qazir túngi jaryqtandyrý shamdaryn jańalap, 10 myń sharshy metrden astam aýmaqqa kógaldandyrý jumysyn óz qarjysy esebinen júrgizdi. Alań qyrkúıek aıynyń ortasynda el ıgiligine beriledi.
Darııa boıynda ornalasqan «Syr Ana» monýmentinde «Tehnosnastka-Remservıs» JShS merdiger mekemesi 3 myń sharshy metrden astam aýmaqqa kógaldandyrý jumystaryn júrgizdi. Monýment mańynda eki zamanaýı sýburqaq ornatylǵan. Munda jaıaý júrginshi joly, jańa úlgidegi oryndyqtar, jaryq baǵanalary jáne 2 sporttyq oıyn alańy bar.
Qalanyń ortalyq bóligindegi Nursultan Nazarbaev dańǵylynyń boıyndaǵy abattandyrý jumystary men jaıaý júrginshiler jolynyń qurylysy qarqyndy júrip jatyr. Kóshe boıynda 6 shaqyrymǵa jýyq aýmaq kógaldandyryldy. Oǵan qosa trotýar salynady. Bul jumystarǵa jaýapty «Asanas-Dar» JShS atalǵan isti ýaqytynda atqaramyz dep otyr.
Sondaı-aq, Qyzylordada kópqabatty úıdiń qabyrǵasyna Abaıdyń beınesi salynýda.
