Qyzylorda qalasynda zańdy burmalaǵan polıtseı sottaldy
QYZYLORDA. QazAqparat - Qyzylorda qalasynda zańdy burmalap, polıtseı sottaldy, dep habarlaıdy QazAqparat tilshisi oblystyq prokýratýranyń baspasóz qyzmetine silteme jasap.
Oblystyq prokýratýra ákimshilik ister boıynsha qabyldanǵan sheshimderdi zerdeleý barysynda polıtsııa qyzmetkeriniń ákimshilik óndiris materıaldaryn burmalaý deregin anyqtady.
Atap aıtsaq, jergilikti polıtseı qyzmettik avtokólikpen kezekshilikte júrip, Qyzylorda qalasyndaǵy dúken tusynda toqtap turǵan «Hyundai Ascent» markaly avtokóliginiń ishinde júrgizýshisiniń syra iship otyrǵanyn baıqaǵan. Ol júrgizýshini medıtsınalyq kýálandyrýdan ótkizý úshin oblystyq narkologııa ortalyǵyna alyp barǵan. Onda kólik júrgizýshisine jeńil dárejedegi masańdyǵy týraly qorytyndy jasalǵan.
Polıtsııa qyzmetkeri ákimshilik quqyq buzýshylyq týraly is boıynsha dáleldemelerdi burmalaý maqsatynda júrgizýshige kóp qabatty úılerdiń arasyna avtokólikti ózi basqaryp kirgizýin talap etken. Aıtylǵan talapty oryndaý barysynda ol kólik júrgizýshisin toqtatyp, oǵan avtokólikti alkogoldik masań kúıde basqarǵany úshin ákimshilik quqyq buzýshylyq týraly hattamany toltyrǵan.
Oblystyq prokýratýra mamandary sot qaýlysyn zerdeleý barysynda jol polıtsııasf qyzmetkerine qatysty materıaldar Qylmystyq kodeksiniń 416-babynyń 2-bóligi boıynsha tirkeldi. Sotqa deıingi tergep-tekserý júrgizý úshin sybaılas jemqorlyqqa qarsy is-qımyl ulttyq bıýrosynyń Qyzylorda oblysy boıynsha departamentine joldandy.
Qyzylorda qalasynyń №2 sotynyń úkimimen polıtsııa qyzmetkeri ákimshilik quqyq buzýshylyq týraly is boıynsha dáleldemelerdi burmalaǵany úshin Qylmystyq kodekstiń 416-babynyń 2-bóligimen kináli dep tanyldy. Oǵan 1 jylǵa bas bostandyǵyn shekteý jazasy taǵaıyndalǵan. Úkim zańdy kúshine endi.
Qyzylorda qalasynyń mamandandyrylǵan ákimshilik sotynyń qaýlysymen júrgizýshiniń áreketinde quqyq buzýshylyqtyń quramynyń bolmaýyna baılanysty ákimshilik is qysqartylǵan.
