Qyzylorda qalasynda tómengi synyp oqýshylary búgin onlaın oqıdy

QYZYLORDA. QazAqparat - Qyzylorda qalasynda aýa-raıynyń qolaısyzdyǵyna baılanysty búgin, 15 aqpanda 0-4 synyptar aralyǵyndaǵy oqýshylar onlaın oqıdy, dep habarlaıdy QazAqparat tilshisi.

Sońǵy táýlikte Qyzylorda qalasynda aýa raıy qubylyp tur. Qar jaýyp, joldyń taıǵaqtyǵy ańǵaryldy.

Osyǵan baılanysty qalalyq bilim bólimi tómengi synyp oqýshylary qashyqtyqtan oqytylatynyn habarlady.

«Qyzylorda qalasy boıynsha aýa raıynyń qolaısyzdyǵy baıqalyp otyr. Osyǵan baılanysty 15 aqpanda 0-4 synyptar aralyǵyndaǵy oqýshylar qashyqtan oqytylady. Nátıjesinde qaladaǵy 55 mektep pen jeke mektepterdiń bastaýysh synyptary sabaqty qashyqtan oqıdy», - dep jazylǵan qalalyq bilim bólimi taratqan habarlamada.

Eske salsaq, budan buryn elimiz boıynsha tuman, kóktaıǵaq bolatyny habarlandy.