Qyzylorda qalasynda shyǵys úlgisindegi jabyq bazar salynady
QYZYLORDA. QazAqparat - Qyzylorda qalasynda darııanyń sol jaǵalaýynan shyǵys úlgisindegi jabyq bazar salynady, dep habarlaıdy QazAqparat tilshisi.
Qazir Syrdarııa ózeniniń sol jaǵalaýyn damytý jobasy qolǵa alynyp keledi. Alǵash bul aýmaqta 2017 jyly jańa ǵımarattar boı kóterdi. Qurylys qarqyn alǵan sol jaǵalaýda búginde kópqabatty 50 turǵyn úı paıdalanýǵa berilip, onda 10 myńnan asa turǵyn qonystandy. Jańa qalada murajaı, mektep, balabaqsha, ýnıversıtet, jastar ortalyǵy syndy áleýmettik nysandar da óz jumysyn bastady. Jyl sońyna deıin taǵy 14 turǵyn úıdiń qurylysy aıaqtalyp, kezekte turǵan azamattar baspanaly bolady dep josparlanýda. Sonymen qatar sol jaǵalaýdan 900 oryndyq mektep, 140 oryndyq balabaqsha, teatr, saltanat saraıyn salýda bas josparǵa engizilgen.
Bas josparǵa saı sol jaǵalaýdan shyǵys úlgisindegi jabyq bazar el ıgiligine aınalady. Saýda orny 3 myń sharshy metr aýmaqqa ornalasady. Onyń qurylysy 2020-2023 jyldar aralyǵyna josparlanǵan. Qazir qurylys jumystary bastalyp, aldaǵy jyly birinshi bóligin paıdalanýǵa berý mejelenýde. Qala ákimi Nurlybek Nálibaev qaladaǵy bazarlardan oryn bolmaı syrtynda turǵan kásipkerler kezeń-kezeńimen osy aýmaqqa kóshireletinin aıtty.
Sondaı-aq, sol jaǵalaýdaǵy «Shirkeıli» kanalynyń ústinen kópir salynady. Kópir 4 jolaqty bolady. Uzyndyǵy - 102,8, eni - 21 metr. Kópir salý qazir 90 paıyzǵa oryndalǵan. Qurylys qyrkúıek aıynyń sońyna deıin tel ıgiligine aınalatyn bolady. Bul kópir sol jaǵalaýdy «Batys Eýropa – Batys Qytaı» kúre jolymen baılanystyrady. Qazir ony kúre jolǵa qosý úshin aınalmaly kópir qurylysyn júrgizý josparlanýda.
Sondaı-aq, Qyzylorda qalasynyń dıqandary baý-baqsha ónimderin eksportqa shyǵarmaq.
