Qyzylorda qalasynda karantın rejımine ózgerister engizildi
Bul ózgeris turǵyndar arasynda koronovırýs ınfektsııasynyń aldyn alý jónindegi sharalardy odan ári kúsheıtý maqsatynda qolǵa alyndy. Osy baǵytta Qyzylorda qalasy bas memlekettik sanıtar dárigeriniń qaýlysy kúshine endi.
Qyzylorda qalasy ákimdiginiń habarlaýynsha, oblys ortalyǵynda koronovırýs ınfektsııasynyń naqtylanǵan jaǵdaıy 7 paıyzǵa ósken. Osyǵan baılanysty qala aýmaǵynda ınfektsııany shoǵyrlandyrý jáne taralýyna jol bermeý maqsatynda shekteý sharalary engizildi. Ol epıdemıologııalyq jaǵdaı turaqtanǵanǵa deıin jalǵasady.
Endi kópshilik merekelik is-sharalar, ujymdyq, otbasylyq jıyndarǵa tyıym salynady. Al kompıýterlik klýbtar, býkmekerlik jáne loto, moto-kontoralardyń jumysy kúsheıtilgen sanıtarııalyq-dezınfektsııalyq rejımmen saǵat 08.00-den 20.00-ge deıin shekteledi. Ol buryn 23.00-ge deıin bolatyn. Kınoteatrlar, túngi klýbtar, saýda oıyn-saýyq ortalyqtary janyndaǵy balalar oıyn alańdary qyzmetin toqtata turady.
«Balalarǵa arnalǵan jazǵy tynyǵý, saýyqtyrý lagerleri, mektep janyndaǵy kúndizgi lagerlerdiń jumys jasaýyna tyıym salynady. Sondaı-aq, oqýshylar jáne mektep jasyna deıingi balalardyń ekskýrsııasyn ótkizýge bolmaıdy. Qalalyq demalys parki óz jumysyn sanıtarlyq-dezınfektsııalyq normalardy qatań saqtaı otyryp jalǵasady. Sonymen qatar, barlyq memlekettik organdar, mekemeler, uıymdar, kásiporyndar shtat kestesinde 30-dan astam qyzmetker bolǵan jaǵdaıda 50 paıyz qashyqtan jumys jasaý nysanynda qalady. Qyzylorda qalasynda koronavırýs ınfektsııasyna baılanysty qalyptasqan jaǵdaı qatań baqylaýda», - dep málim etti Qyzylorda qalasynyń ákimdigi.
Joǵaryda atalǵan talaptardyń saqtalýyn baqylaý maqsatynda qala ákimdigi janynan mobıldi top qurylyp, tıisti jumys júrgizilip jatyr.
Eske sala keteıik, Qyzylorda oblysynda 80 jastaǵy qarııa koronavırýs juqtyrǵan bolatyn.