Qyzylorda qalasynda halyqty baspanamen qamtý kórsetkishi jaqsardy
Búgingi tańda oblys ortalyǵynda 2170 páterli 46 kópqabatty turǵyn úıdiń qurylysy júrgizilýde. Onyń jalpy quny 17,5 mlrd teńgege jýyq. 2020 jyly bastalǵan Syrdarııa ózeniniń sol jaǵalaýynda kópqabatty – 12, SPMK-70 turǵyn aýdanynynda ıpotekalyq 12 turǵyn úıdiń qurylysyn aıaqtaýǵa tıisti qarjy bólindi.
Al byltyr SPMK-70 №2 turǵyn aýdanynda ıpotekalyq 6 úıdiń (6300 páterli), arendalyq 5 turǵyn úıdiń qurylysy bastaldy. Sondaı-aq oblys ortalyǵynda budan buryn apatty úılerde turyp kelgen otbasylar úshin Syrdarııa ózeniniń sol jaǵalaýynda 50 páterli 1 úıdiń qurylysy qolǵa alanyp otyr. Ol jyl sońyna deıin paıdalanýǵa beriledi dep josparlanýda.
«Jalpy alǵanda, bıyl turǵyndarǵa 1370 páter tabystaý kózdelýde. Onyń ishinde 430-i kópbalaly otbasylarǵa berilse, 50-i apatty turǵyn úılerde turyp jatqan azamattarǵa beriledi. Sondaı-aq 250-in kezekte turǵan otbasylar alsa, 640 páter «Otbasy bank» arqyly tabystalady. Aıta keterligi, kezektegi az qamtylǵan kópbalaly otbasylarǵa 192 páter satyp alýǵa 2 mlrd 456 mln teńge bólingen. Qazirge deıin 33 páter satyp alynsa, qalǵanyna memlekettik satyp alý konkýrsy júrgizilýde», - dedi Qyzylorda qalalyq qurylys bóliminiń basshysy Birjan Dalabaev.
Oblys ortalyǵynda jeke ınvestorlar esebinen turǵyn úı qurylysy júrgizilýde. Mundaı azamattar esebinen 8 mlrd teńgege 217 páterli 9 úıdiń boı kóterýde. Budan bólek, «Nurly jer» memlekettik baǵdarlamasy aıasynda qalanyń ınjenerlik-kommýnıkatsııalyq ınfraqurylymyn damytý jáne júrgizýge mán berildi. Bul maqsatta ulttyq, respýblıkalyq jáne oblystyq bıýdjet esebinen barlyǵy 3 mlrd 988 mln teńge bólindi. Atalǵan qarjylar Syrdarııa ózeniniń sol jaǵalaýyndaǵy turǵyn úı aýlalaryn abattandyrýǵa, SPMK-70 turǵyn aýdanyn jylý, káriz, elektr, telefon jelilerimen qamtamasyz etýge, Sabalaq saıajaıyn aýyzsýmen qamtýǵa, qalanyń birqatar aýmaǵyn aýyzsý jáne káriz sý jelileri, elektr, gaz, jylý júıelerin júrgizýge qaraldy.
