Qyzylorda qalasynda bıyl balalarǵa arnalǵan 30 oıyn alańy salynady
Bul jumystar «Jumyspen qamtý jol kartasy» baǵdarlamasy aıasynda qolǵa alynyp otyr. Qazirgi tańda 18 nysannyń qurylysy tolyǵymen aıaqtaldy. Qalǵan 12 alańdy júzege asyrý jumystary jalǵasýda. Sonymen qatar qala boıynsha 60-tan asa oıyn alańyna jóndeý júrgizilýde.
Qyzylorda qalasynyń ákimi Nurlybek Nálibaev «Jumyspen qamtýdyń jol kartasy» baǵdarlamasy aıasynda oblys ortalyǵynda júzege asyp jatqan qurylys sapasyna baqylaý júrgizdi. Qala basshysy aldymen «Aqmeshit» shaǵynaýdanyndaǵy №28 úıdiń aýlasyna salynǵan balalar oıyn alańynyń sapasyn tekserdi. Qazir alań tolyǵymen zamanaýı talaptarǵa saı, qaýipsiz ári sapaly. Bul jumysqa turǵyndar alǵysyn bildirdi.
«Buryn balalarymyzdyń oınaýyna alańdap otyratyn edik. Mundaı oryndardyń bolmaýy saldarynan bir jerin jaraqattap alyp jatatyn. Qazir qorqynysh seıildi, oıyn alańy bizdiń kóńilimizden shyǵady», - dedi qala turǵyny Saltanat Kúzerbergenova.
Oblys ortalyǵyn aralaý barysynda qala basshysy atalǵan shaǵynaýdanǵa qarasty №26, 27 úı turǵyndarymen kezdesti. Olar tarapynan aıtylǵan máseleler boıynsha tıisti sala basshylaryna tapsyrma berildi. Tapsyrma 10 kúnniń ishinde oryndalýy tıis ekenine nazar aýdardy.
Odan ári qala ákimi oblys ortalyǵynyń ortalyq bóligindegi Ǵ.Muratbaev kóshesi №4 mekenjaıynda salynǵan sport-jattyǵý alańyna bardy. Jobany «Aqmar jáne K» JShS júzege asyrýda. Qurylys jumystary negizinde 18 adam eńbekpen qamtylǵan.
Budan bólek qazir qala aýmaǵynda taǵy 2 balalarǵa arnalǵan strıtbol alańdary salynýda. Olardyń biri - Buqarbaı batyr kóshesine ornalasqan. Bul strıtbol alańynyń qurylysy boıynsha merdiger anyqtalyp, qurylysy bastalǵan. Ony «SpetsStroı LTD» JShS júzege asyratyn bolady. Qazirgi ýaqytta alańdaǵy eski topyraq shyǵarylyp, ol jańartylyp, asfalt quıyldy. Qajetti jabdyqtarǵa Almaty qalasyna tapsyrys berilgen. Sporttyq jabdyqtar apta aıaǵynda jetkiziledi.
Al Tasbóget kentinde ornalasqan strıtbol alańynda qurylys jumystary qarqyndy júrýde. Atalǵan nysanǵa tas tóselip, qajetti sport jabdyqtaryna tapsyrys berilgen.
Sondaı-aq, Qyzylordada azyq-túlik baǵasy baqylaýda.