Qyzylorda qalasynan Túrkistan oblysyna deıingi aralyqta jol jabyldy
QYZYLORDA. QazAqparat - Qyzylorda qalasynan Túrkistan oblysyna deıingi aralyqta avtokólik qozǵalysy ýaqytsha shekteldi, dep habarlaıdy QazAqparat tilshisi.
Qyzylorda oblysynda aýa raıy kúrt qubyldy. Jańbyr men qar jaýǵanyna baılanysty asfalt betinde muz qatty. Bul jol-kólik oqıǵasynyń jıileýine alyp keldi.
Osyǵan oraı Qyzylorda oblystyq polıtsııa, oblystyq tótenshe jaǵdaılar departamentteri jáne «Qazavtojol» UK AQ fılıaly jol boıynda tıisti is-sharalardy qolǵa aldy.
19 jeltoqsan saǵat 10.00 bastap «Samara-Shymkent» avtomobıl jolynyń 1824-2057 shaqyrymy ýchaskesinde avtokólik qozǵalysy ýaqytsha shekteldi.
Jabylǵan joldyń jalpy uzyndyǵy - 233 shaqyrym. Ol Qyzylorda qalasy men Túrkistan oblysyna deıingi aralyqty qamtıdy.
Bul fakti boıynsha Qyzylorda oblysynyń QAPB jáne polıtsııa departamentiniń jol-tehnıkalyq ınspektsııa qyzmetkerleri «QazAvtoJol» UK AQ, «Qazaqavtojol» JShS mamandarymen birlesip avtojoldardy tekserdi.
Kólik qozǵalysyn shekteý úshin oblystyq polıtsııa departamentiniń patrýl polıtsııasy rotasynyń 5 ekıpajy, Shıeli jáne Jańaqorǵan aýdandarynyń polıtsııa bólimderiniń 53 qyzmetkeri 13 avtokólikpen jumyldyryldy.
Sondaı-aq, «Qazavtojol» mekemesi mamandary 12 arnaıy tehnıkamen «Samara-Shymkent» avtojolynyń muz basqan ýchaskesine 120 tonna qum jáne tuz sekildi taıǵaqqa qarsy materıaldar tóseldi.
Aıta keteıik, «Samara-Shymkent» tasjolynyń Qyzylorda qalasy men Túrkistan oblysynyń shekarasyna deıingi aralyǵynda aýa raıynyń qolaısyzdyǵynan birneshe jol apaty bolǵan.
Atalǵan oqıǵalardan qaıtys bolǵandar jáne zardap shekkender joq.
