Qyzylorda qalasyna qarasty aýyldarda áleýmettik máseleler sheshilip keledi
Bul jumystar buqaralyq aqparat quraldary ókilderine arnalǵan baspasóz týry barysynda keńinen tanystyryldy, dep habarlaıdy QazAqparat tilshisi.
Oblys ortalyǵynyń irgesinde jatqan Qyzyljarma aýyldyq okrýginde jol jóndeý, jaryqtandyrý, aýyzsý jáne elektr qýatymen qamtamasyz etýde júıeli jumystar atqarylýda. Atalǵan ıgilikti ister «Óńirlerdi damytý-2020», «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamalardyń negizinde qolǵa alynǵan.
Bıyl Qyzyljarma aýyldyq okrýginde 21 kóshege ortasha jol jóndeý jumystary júrgizildi. Onyń ishinde 13 kóshege asfalt, 8 kóshege qıyrshyq tas tóseldi. Kólik qozǵalysy men jaıaý júrginshilerdiń qaýipsizdigi úshin túngi jaryq máselesi sheshildi. Bul maqsatta bıyl aýylda 7 kóshege jaryqtandyrý júrgizilgen.
Sondaı-aq, qala boıynsha atqarylyp jatqan «Shet aımaq» baǵdarlamasy aıasynda kóptegen túıtkildi máseleler sheshimin taýyp keledi. Qazir turǵyndardy aýyz sýmen qamtý máselesi júzege asty. Óńirge belgili «Melıorator» kompanııasy eldimekendegi jańadan qonystanǵan azamattar turatyn «Qyzyljarma-2» bóliginde uzyndyǵy 53,6 shaqyrymǵa sozylatyn aýyz sý qubyrlaryn tartý isin qolǵa alǵan. Turǵyndar jeltoqsan aıynyń aıaǵynda sapaly aýyz sýǵa tolyqtaı qol jetkizedi.
Budan bólek, aýyldyq okrýgtegi 8 kóshede tozyǵy jetken elektr baǵanasy da jańalanýda. Bul joba aıasynda bir fazaly jáne úsh fazaly 485 jeke turǵyn úıge elektr eseptegish aqysyz negizde ornatylýda.
Qalaǵa qarasty Qosshyńyraý aýyldyq okrýginde Dosan jáne Abaı aýyldary bar. Bıyl aýyldyq okrýgte 5 kóshege tas jáne 2 kóshe asfalt tóseldi. Máselen, Abaı aýylynda barlyǵy 17 kósheniń barlyǵyna jol salynǵan. Endigi kezekte Dosan aýylynyń jolyn jańartýǵa betburys jasalýda. Halyqtyń suranysy boıynsha Abaı aýylynda sport alańy salyndy. Mádenıet úıiniń tóbesin jumsaq jabynmen aýystyryldy. Kóshe jaryǵyn turaqtandyrý maqsatynda Abaı aýylynda qosalqy stantsııasy ornatylmaq. Sonymen qatar, Dosan eldi mekenindegi № 20, 15 kóshelerine jaryq baǵanalaryn ornatý jumystary júrgizilýde.