Qyzylorda qalasyn gazdandyrý 95 paıyzǵa jetti
QYZYLORDA. QazAqparat - Búgingi kúni Qyzylorda qalasyn gazdandyrý jumystary 95 paıyzǵa oryndaldy.
Bul týraly qala ákimi Nurlybek Nálibaev halyq aldynda bergen esebinde málimdedi, dep habarlady QazAqparat HAA tilshisi.
Shahar basshysynyń aıtýynsha, halyqty kógildir otynmen qamtamasyz etý baǵytyndaǵy jumystar kezeń-kezeńimen júzege asyrylýda.
Eki jyl buryn Tasbóget kenti men Qyzyljarma aýyldyq okrýginde gazdandyrý jumystaryna 2 mlrd 157 mln. teńge bólinip, 4 myńnan astam turǵyn úı, áleýmettik jáne kásipkerlik nysandar kógildir otynmen qamtyldy.
Al byltyrǵy jyly Talsýat aýyldyq okrýgin gazdandyrý úshin oblystyq bıýdjetten 271 mln teńge qaralyp, 500-ge jýyq turǵyn úıge, 3 áleýmettik nysanǵa tabıǵı gaz tartyldy.
Nátıjesinde qalany gazdandyrý kórsetkishi 95 paıyzdy qurady.
Sondaı-aq N.Nálibaev málim etkendeı, QR turǵyn úı-kommýnaldyq sharýashylyǵyn jańǵyrtý men damytýdyń 2011-2020 jyldarǵa arnalǵan baǵdarlamasy aıasynda sońǵy tórt jylda qala boıynsha 3 mlrd 61 mln. teńgege kópqabatty 121 turǵyn úı kúrdeli jóndeýden ótti.
