Qyzylorda qalasy mańyndaǵy qýraǵan shóp órti sóndirildi
QYZYLORDA. QazAqparat - Qyzylorda qalasy mańyndaǵy qýraǵan shóp órti sóndirildi, dep habarlaıdy QazAqparat tilshisi.
Qyzylordada qýraǵan shóptiń órtenýi saldarynan qalanyń birqatar bóligin tútin basyp qaldy.
12 maýsymda saǵat 14.52-de Qyzylorda oblysynyń Tótenshe jaǵdaılar departamentiniń 112 pýltine Prezıdent saıabaǵyna qarama-qarsy ornalasqan Shirkeıli kanalynyń shetindegi qýraǵan shóptiń órtengeni týraly habarlama kelip tústi.
«Oqıǵa ornyna órt sóndirýshiler dereý jolǵa shyqty. Olardyń barlaý jumystary nátıjesinde shamamen 6 gektar aýmaqtaǵy shóp órtenip jatqandyǵy anyqtaldy. Qatty jel jáne qolaısyz aýa-raıy saldarynan jaǵdaı kúrdelendi. Jedel áreket nátıjesinde órt saǵat 17.25-te oqshaýlanyp, saǵat 18.10-da tolyǵymen sóndirildi», - dep málim etti Qyzylorda oblystyq tótenshe jaǵdaılar departamentinen.
Vedomstvo málimetinshe, oqıǵa ornynda Órt sóndirý qyzmeti, Apattar medıtsınalyq ortalyǵy, Jergilikti polıtsııa qyzmeti basqarmasy, «QazTransGazAımaq» jáne jergilikti atqarýshy organnan 17 tehnıkamen 76 qyzmetkeri jumys atqardy.
