Qyzylorda qala kúnin toılap jatyr
QYZYLORDA. QazAqparat- Qyzylordadaǵy «Qala kúni» merekesi aq mol bolsyn, halyqtyń nesibesi artsyn degen nıetpen «Qymyz-shubat», «Qaýyn-qarbyz» jáne «Dámdi baýyrsaq» festıvalimen bastaý aldy, dep habarlaıdy QazAqparat tilshisi.
Sharaǵa oblys ákimi Qyrymbek Kósherbaev jáne qala basshysy Nurlybek Nálibaev arnaıy qatysyp, turǵyndardy aıtýly merekemen quttyqtady.
Shara uıymdastyrylǵan «Syr súleıleri» alleıasynda qalaǵa qarasty kent, aýyldyq okrýgterdiń qaz-qatar ornalasqan qarasha úılerinen etnoaýyl boı kóterdi.
Arnaıy tigilgen aq shatyrlarda qala meıramhanalary ulttyq dastarhan mázirin jáne sharýa qojalyqtary qaýyn, qarbyz, qymyz, shubat, baýyrsaqtardy qala turǵyndary men qonaqtaryna tartý etti.
Atap aıtqanda, qalaǵa qarasty sharýashylyq qurylymdary 250 lıtr qymyz, 300 lıtr shubat, 3,2 tonna qaýyn, 4,5 tonna qarbyz, 75 kg qaýyn qaq, 52 kg qaýyn tosaby jáne basqa da ónimderdi ákeldi.
Barlyq ónimder shara qonaqtaryna tegin úlestirildi.
Sonymen qatar, jergilikti ónerpazdardyń kontserti uıymdastyrylyp, shara barysynda belsendilik tanytqan birqatar kásipkerler qala ákiminiń alǵys hattarymen marapattaldy.
Aıta keteıik, «Qala kúni» merekesi 23 qyrkúıekke deıin jalǵasady.
