Qyzylorda halqynyń 70 paıyzy jyl sońyna deıin tabıǵı gazben qamtylady

QYZYLORDA. QazAqparat - Qyzylorda oblysy halqynyń jyl sońyna deıin 70%-y tabıǵı gazǵa qol jetkize alady, dep habarlaıdy QazAqparat tilshisi.

Oblysty gazdandyrý isi 2014 jyldan beri «Beıneý-Bozoı-Shymkent» magıstraldyq gaz qubyry jobasy aıasynda qolǵa alynyp otyr. Magıstraldyq gaz qubyrynyń 846 shaqyrymy Qyzylorda oblysy arqyly ótedi.

Sońǵy alty jylda Qyzylorda, Baıqońyr qalalary jáne oblystyń 7 aýdan ortalyǵynyń tórteýi kógildir otynmen qamtamasyz etildi. Qalǵan 3-i jyl sońyna deıin qamtylatyn bolady.

«Bıyl gazben jabdyqtaý jobasyn iske asyrý úshin bıýdjetten 5,5 mlrd teńge bólindi. Shilde aıynda Aral aýdanynyń Jaqsyqylysh kentine gaz berildi. Onda 5 myńnan astam adam turady. Al Qarmaqshy, Jalaǵash, Syrdarııa aýdandarynyń ortalyqtaryna jyl sońyna deıin gaz keledi. Al Qazaly aýdanyndaǵy 50 myńǵa jýyq adam turatyn Qazaly qalasy men Ǵanı Muratbaev, Shıeli aýdanyndaǵy Baısyn eldi mekenderine gaz berý josparlanýda. Nátıjesinde, abıyl oblys turǵyndarynyń 70%-y tabıǵı gazǵa qol jetkize alady», - dep málim etti oblys ákimdiginen.

Odan keıingi kezeńde Qyzylorda qalasy men aýdan ortalyqtaryna irgeles eldi mekenderdi gazdandyrý kezeń-kezeńimen iske asyrylady.

Qarasha aıynda Qazaly qalasy men Shıeli aýdanynyń Bekejanov aýylyn gazben jabdyqtaý jobasy iske asyp, olar kelesi jyly aıaqtalady.

2021 jyly Qyzylorda qalasyndaǵy Naýryz jáne Mahambetov, Qarmaqshy aýdanynyń Tóretam jáne Aqaı, Shıeli aýdanynyń Qodamanov, Alǵabas, Aqmaıa eldi mekenderin gazdandyrý josparlanǵan.

Sondaı-aq, Qyzylordada Syrdarııa ózeniniń sol jaǵalaýyn ıgerý jumystary jalǵasýda.