Qyzylorda dárigerleri endi shala týǵan nárestelerdi eski salt - «tymaqqa salý» amaly boıynsha baqpaq
QYZYLORDA. QazAqparat - Qyzylorda oblystyq Ana men bala ortalyǵynyń málimetine súıensek, aımaqta ótken jyly dúnıege kelgen 350 náresteniń 37-si shala týylǵan. Bıyl 9 aıda 510 bala merziminen buryn týylǵan. Bul týraly oblystyq densaýlyq saqtaý basqarmasynyń baspasóz qyzmeti habarlady.
Jańa týǵan 35 shaqalaqtyń salmaǵy 1 kelige de jetpeıdi. Buryn egde jasqa kelip bosanǵan áıelderdiń balasy álsiz bolsa, búginde ımmýnıtettiń tómendigi jas analarda da baıqalady. - Kóptegen adamda merziminen buryn dúnıege kelgen balalardyń ary qaraıǵy taǵdyry men múgedektikke baılanysty suraqtar týyndaıdy. Jórgekte jetilýge tıisti bópeniń babyn tabý ońaı sharýa emes. Asa uqypty kútim, joǵary tehnologııalyq quraldardy qoldana otyryp sapaly emdeý qajet. Uzaq baqylaý taǵy kerek,-deıdi oblystyq ana men bala ortalyǵy bas dárigeriniń orynbasary Manat Bodyqova.
Ata-ájelerimiz bul problemanyń túıinin ótken ǵasyrlarda-aq sheshken. On qursaq kóterip, olardy ósirip-jetildirgen batyr ana Uljan ájeı shala týylǵan nemeresin «tymaqqa salyp» ósiripti. Qazir ol salt birshama ózgergen. Jańalanǵan nusqanyń avtorlary - «28 ilmek» klýby. Qaıyrymdylyq uıymy shala týylǵan nárestelerge qajetti toqyma buıymdaryn ázirleıdi.
Áljýaz balany baptaýda ata-babalar amal-áreketin qazirgi medıtsına da moıyndady. Toqyma kıimderdiń shala týǵan balalardyń ósip-jetilýine paıdasy orasan ekenin aq halattylar medıtsınalyq turǵyda dáleldengenin aıtady. Qazirgi tańda oblystyq perınataldy ortalyq «28 ilmek» klýbymen tyǵyz baılanysta.
