Qyzylorda bızneske qolaıly qalaǵa aınalýy tıis- Jaqsylyqov.
QYZYLORDA. QazAqparat - Bul týraly Qyzylorda oblysy kásipkerler palatasynyń dırektory Ǵalymbek Jaqsylyqov qala ákimdiginde ótken shaǵyn jáne orta bıznesti damytý máselelerine arnalǵan májiliste aıtty, dep habarlady QazAqparat tilshisi.
«Búginde kásipkerler palatasy men jergilikti atqarýshy organdar kásipkerlerdiń máselelerin sheshý baǵytynda áriptestik negizde tıisti sharalar qabyldaý arqyly bıznes ókilderiniń ózekti máselelerin jedel sheshýde. Oǵan jaqynda ǵana sheshilgen qaladaǵy dúńgirshekter máselesin aıtýǵa bolady.
Al, jalpy qalada kásipkerlik máselesimen aınalysqysy keletin azamattar úshin Kásipkerler palatasy tarapynan qarjylaı emes qoldaý túrlerin kórsetýge ázirmiz.
Qazir oblysymyzda «Nátıjeli jumyspen qamtý - 2017-2021» baǵdarlamasy aıasynda «Bastaý bıznes» jobasy bastaldy. Atalmysh jobaǵa oblystyń 5 aýdany qatysýda. Jobaǵa qatysqysy kelgen aýdan azamattary 1 sáýirden bastap testileýden ótkizilýde. Búgingi kúnge deıin 5 aýdanda ótken testileýge 229 adam qatysty. Qyzylorda qalasy ázirge bul jobaǵa enbeýine baılanysty biz qalaǵa qarasty aýyldyq okrýg turǵyndaryna qoldaýdyń ózge de túrlerin qarastyryp jatyrmyz.
Máselen, qazir Kásipkerler palatasy «Damýdyń», «QazAgronyń» mamandarymen birge qalaǵa qarasty aýyldyq okrýg turǵyndaryna arnalǵan «Keńes berý kúni» aktsııasyn júrgizýde. Aktsııa barysynda jumyssyz jáne az qamtylǵan otbasy jastaryn kásipkerlikke tartý maqsatynda keńes, aqparat berý jumystary júrgizilýde. Búgingi kúnge deıin shara 7 aýyldyq okrýgte ótkizildi. Aıta ketý kerek, bul aktsııany toqsanyna bir ret ótkizýdi josparlap otyrmyz», - deı kele palata basshysy qala ákimine kelesi usynysyn jetkizdi.
«Kásipkerler palatasymen bıznes ókilderinen túsetin shaǵymdarǵa taldaý jasaý barysynda aryzdardyń 30 paıyzdan astamy jer qatynastary salasyna qatysty ekendigi anyqtaldy. Osy jerde mynadaı usynys aıtqym keledi. «Qyzylorda - bızneske qolaıly qala» degen bastamany júzege asyrýdy usynamyn. Jalpy kásipkerlerdiń máselesin sheshýde neǵurlym jeńil jolyn qarastyrý qajet. Bul rette, Palata jan-jaqty qoldaý kórsetýge ázir. Máselen, Qyzylorda oblysynyń kásipkerler palatasy oblys turǵyndary úshin «Bıznes-mektep» komponenti boıynsha oqý júrgizedi. Atalmysh komponenttiń ishinde eki kúndik aqysyz «Bıznes-keńesshi» jobasy boıynsha biliktilikti jetildirýge bolady.
«Bıznes-keńesshi» jobasy - áreket etýshi jáne kásipti jańadan bastaǵan kásipkerlerge sonymen qatar kásipkerlik bastamasy bar turǵyndarǵa qysqa merzimdi kásipkerlikti júrgizý negizderin oqytatyn joba. Osy rette, eger aýyldyq okrýg ákimderi aýyldan oqýǵa nıetti azamattardy jınap, talapqa saı ótkiziletin orynmen qamtamasyz etse, «Bıznes-keńesshi» kýrsyn aýyldarǵa baryp ótkizýge daıynbyz», - dedi Ǵalymbek Jaqsylyqov.
