Qyzylorda aýrýhanasyna súıek quramyn zertteıtin apparat ornatyldy
QYZYLORDA. QazAqparat - Qyzylorda qalalyq aýrýhanasynyń materıaldyq tehnıkalyq bazasy jańa qural-jabdyqtarmen tolyqty. Onyń ishinde densıtometr apparaty naýqasqa naqty dıagnoz qoıýǵa múmkindik berip, syrqatty asqyndyrmaı emdeýge jol ashady. Búginde Ońtústik Koreıa elinde jasalynǵan quraldyń artyqshylyǵyn qyzylordalyq turǵyndar sezinip úlgerdi, dep habarlaıdy QazAqparat tilshisi.
Qala turǵyny Sholpan Balǵabaeva birneshe kúnnen beri aýrýhanada em alýda. 35 jastaǵy kelinshek býyn aýrýyna shaldyqqan. Udaıy dárigerlerdiń baqylaýynda bolyp, tıisti em-domdaryn qabyldap keledi.
«2012 jyldan beri býyndarym syrqyrap aýyrady. Jańadan kelgen apparattyń ıgiligin kórip jatyrmyz. Mamandar da dıagnoz qoıýdan qınalmaıtyn bolady. Osy qurylǵy súıegimniń mıneraldy tyǵyzdylyǵyn anyqtap berdi. Bul óte mańyzdy ekeni belgili. Buryn tek rentgenge túsýmen shekteletinbiz. Jyl saıyn medıtsınamyzdyń osylaısha damyp kele jatqandyǵy qýantady», - deıdi Sholpan Balǵabaeva.
Rasymen, densıtometr apparaty dárigerlerdiń jumysyn birshama jeńildetti. Revmatolog-mamandar bul qurylǵynyń súıek quramyn zertteýde taptyrmas qural ekenin aıtady.
«Súıektiń tyǵyz bolýy úshin kaltsıı úlken ról atqarady. Sol sebepti onyń súıektegi mólsherin udaıy anyqtap otyrǵan abzal. Bul ásirese, áıel adamdar úshin asa mańyzdy. Densıtometr apparaty jalpy súıektiń mıneraldy tyǵyzdyǵyn zertteıdi. Buryn rentgenniń kómegine júginetin edik. Onyń ózinde tek boljaldy qorytyndy jasaıtynbyz. Qazir táýligine 15-ke jýyq naýqasty apparatqa túsirip jatyrmyz», - deıdi Qyzylorda qalalyq aýrýhanasynyń dáriger-revmatology Gúlnazym Qojahmet.
Aldaǵy ýaqytta Qyzylorda qalalyq aýrýhanasynyń materıaldyq bazasy áli de jańartylatyn bolady.
