Qyzylorda áýejaıynda úsh qyzdy zańsyz shetel asyrmaq bolǵan kúdiktiler ustaldy
QYZYLORDA. QazAqparat - Qyzylorda oblystyq ІІD Uıymdasqan qylmysqa qarsy kúres basqarmasy Qyzylorda qalasynyń 3 azamatshasyn jezókshelikpen aınalysý úshin Túrkııa memleketine attandyrmaq bolǵan jerinen 1968 jáne 1990 jyly týǵan eki azamatshany quryqtady. Bul týraly QazAqparat tilshisi habarlady.
Almaty jáne Qyzylorda qalasynyń eki turǵyny aldyn ala sóz baılasyp, 36, 26 jáne 22 jastaǵy azamatshalardyń senimine kirip, tabysy jaqsy jumysqa ornalastyratyndyqtaryn aıtqan. Alaıda, olardyń senimderin teris maqsatta paıdalanyp, Túrkııa memleketine jezókshelikpen aınalysýǵa jibermek bolǵan. Polıtsııa qyzmetkerleri olardyń bul áreketin áshkerelep, jedel-izdestirý sharalary barysynda Almaty qalasynyń áýejaıynan ustady.
Qazirgi tańda atalǵan derek sotqa deıingi tergep-tekserýdiń biryńǵaı tizilimine Qazaqstan Respýblıkasynyń 128-baby 3-bóligimen (Adam saýdasy) tirkelip, tergeý áreketteri júrgizilýde. Kúdiktiler Qyzylorda QІІB-niń ýaqytsha ustaý abaqtysyna qamaldy.
Aıta keteıik, 2017 jylǵy 25-27 tamyz aralyǵynda Qyzylorda oblysy aýmaǵynda adam saýdasyna baılanysty qylmystardy ashý jáne olardyń jolyn kesý, eńbegin qanaý maqsatynda adamdardy urlaý jáne bas bostandyǵynan aıyrý qylmystaryn anyqtaýǵa baǵyttalǵan «Stop-trafık» jedel profılaktıkalyq sharasy júrgizildi.
Onyń barysynda bes qylmystyń beti ashylyp, Qazaqstan Respýblıkasy Ákimshilik quqyqbuzýshylyq týraly kodekstiń 449-babymen (Qoǵamdyq orynda tıisý) kózdelgen 31 ákimshilik quqyqbuzýshylyq anyqtaldy.
