Qyzylorda áýejaıynda koronavırýsqa qarsy oqý-jattyǵý ótkizildi

QYZYLORDA. QazAqparat - Qyzylorda qalasyndaǵy «Qorqyt ata» áýejaıynda koronavırýsqa qarsy oqý-jattyǵý sharasy ótkizildi, dep habarlaıdy QazAqparat tilshisi.

Atalmysh shara barysynda barlyq qyzmetterdiń jáne qurylymdardyń qaýipti derttiń aldyn alýǵa baǵyttalǵan is-qımyl jasaý tártibin pysyqtaýǵa mán berildi. Negizinde Qyzylordaǵa Qytaıdan tikeleı qatynaıtyn áýe reısi joq. Dese de saqtyq sharalaryna nazar aýdarý óte mańyzdy.

Aldyn-ala jasalǵan josparǵa sáıkes «Almaty-Qyzylorda» áýe reısinde Qytaıdyń Ýhan qalasynan kele jatqan jolaýshyda bas aýyrýy, dene qyzýynyń kóterilýi, jótel, bulshyq etterdiń aýrýy sekildi koronavırýs belgisi bar ekendigi anyqtalady. Osyǵan baılanysty Qyzylorda bólimshelik kóliktegi taýarlar jáne kórsetiletin qyzmetterdiń sapasy men qaýipsizdigin baqylaý basqarmasy tarapynan jedel jospar men jedel syzbaǵa sáıkes barlyq tıisti emdeý-profılaktıkalyq mekemelerine, obaǵa qarsy kúres stantsııasyna, quqyq qorǵaý organdaryna jáne ózge de mekemelerge aqparat berildi.

Budan keıin barlyǵy áýe kemesiniń kelýine baılanysty áýejaıda epıdemııaǵa qarsy kúres sharalaryn júrgizýge jınaldy. Aýrýdyń taralýyn anyqtaýǵa qatysqan barlyq qyzmetter men bólimsheler naýqastyń koronavırýs anyqtalǵan jaǵdaıdaǵy naqty ózara árekettesýi men daıyndyǵyn kórsetti.

Budan buryn Qyzylordada medıtsınalyq betperde tapshylyǵy joq ekenin habarlaǵan edik