Qyzylorda ákimi avtobýs parki ujymyn naýryz merekesimen quttyqtady
Ulttyq merekemizdi keńinen nasıhattaý, qala turǵyndaryna merekelik kóńil - kúı syılaý maqsatynda qalaǵa qarasty barlyq kent, aýyldyq okrýgterde jáne qala kóleminde ornalasqan mekemelerde aqshańqar qarasha úıler tigilip, Naýryz meıramynyń basty sımvoly sanalatyn naýryz kóje men ulttyq taǵamdar ázirlenip, merekelik sharalar uıymdastyryldy.
Qyzylorda qalasynyń ákimi Nurlybek Mashbekuly «Qyzylorda avtobýs parki» uıymdastyrǵan sharaǵa qatysyp, barsha ujym qyzmetkerlerin merekemen quttyqtady.
«Qoǵammen tikeleı qyzmet jasaıtyn, Sizderdiń mekemelerińizge júktelgen mindet pen jaýapkershilik óte joǵary. «Qyzylorda» avtobýs parki» az ýaqyttyń ishinde aıtýly jetistikterge qol jetkizip keledi.
Ózderińizge belgili, osydan 3 jyl buryn qalaishilik qoǵamdyq kólik tasymalyn sapaly qyzmetpen qamtamasyz etý maqsatynda «Qyzylorda» avtobýs parki» qurylǵan bolatyn. Qazirgi tańda, qaladaǵy kishi syıymdylyqtaǵy qoǵamdyq kólikterdiń ornyna jańadan barlyq talaptarǵa sáıkes, jolaýshylarǵa yńǵaıly jaǵdaı jasalǵan, ekologııalyq taza úlken syıymdylyqtaǵy zamanaýı 112 avtobýs alynyp, qala halqyna qyzmet etýde.
Munan bólek, jańadan dıspetcherlik pýnktter iske qosyldy.
Barsha qala turǵyndary jáne Sizder úshin de eń úlken jaǵymdy jańalyq, jalpy aýmaǵy 5 gektar jerge, 200 avtobýsqa shaqtalǵan jańa úlgidegi avtobýs parki salynýda.
Ózderińiz kórip turǵandaı, avtobýs parkiniń qurylysy aıaqtalýǵa jaqyn, aldaǵy mamyr aıynda paıdalanýǵa beriledi. Birligimiz ben tirligimiz bolsa, biz áli de talaı belesterdi baǵyndyryp, budan da zor jetistikterge jeterimiz anyq.
Ultymyzdyń rýhynyń asqaqtyǵyn, teginiń tektiligin, salt - dástúrimizdiń saltanatyn pash eter, halqymyzdy ǵasyrlar boıy nur shýaǵyna bólegen Ulystyń Uly kúni shańyraqtaryńyzǵa shattyq, otbasylaryńyzǵa baq-berekesimen ensin», - dedi qala ákimi N.Nálibaev.
Qala ákimi jańadan salynyp jatqan avtobýs parkiniń qurylys jumystarymen tanysyp, barlyq jumysty sapaly jáne merziminde oryndaý qajettigin aıtty.
Jalpy aýmaǵy 5 gektardy quraıtyn, syıymdylyǵy 200 zamanaýı avtobýstarǵa arnalǵan jańa úlgidegi avtobýs parkiniń ereksheligi, qala kóleminde qyzmet kórsetetin úlken syıymdylyqtaǵy avtobýstarǵa arnalǵan turaqtar, janarmaı beketi, kólik jýý alańy jáne avtobýstardyń úzdiksiz jumys jasaýyna jaǵdaı jasaıtyn túrli múmkindikter qarastyrylatyn bolady.
Avtobýs parkiniń qurylysy tolyq aıaqtalyp, iske qosylǵan jaǵdaıda 200-den astam qala turǵyndaryn jumyspen qamtıtyn bolady.
Shara barysynda, mekeme qyzmetkerleri jáne oblystyq mamandandyrylǵan kúzet qyzmeti basqarmasynyń qyzmetkerlerinen quralǵan komandalar asyq atý, arqan tartý, kir tasyn kóterý sekildi ulttyq oıyndardan ózara saıysqa tússe, qarasha úıde qonaqtarǵa naýryz kóje taratylyp, tusaý keser rásimderi uıymdastyryldy.
