Qyzylorda ákimdigi jelide talqylanǵan qyzdyń músinine qatysty túsinikteme berdi
QYZYLORDA. QazAqparat - Qyzylorda kósheleriniń birinde qoıylǵan qazaq qyzynyń músini áleýmettik jelide qyzý talqylandy. Osyǵan oraı qala ákimdigi resmı jaýap berdi, dep habarlaıdy QazAqparat tilshisi.
«Áleýmettik jelide Qyzylorda qalasy kósheleriniń birine qoıylǵan qazaq qyzynyń beınesindegi músin qyzý talqyǵa tústi. Onda boıjetken beınesi er adamǵa kóbirek uqsaıtyny aıtyldy. Aıta keterligi, atalmysh arhıtektýralyq fıgýra qazir Qyzylorda qalasy aýmaǵynda joq. Músin 2015 jyly Naýryz merekesi qarsańynda «Qyzylorda Kórkem» JShS mekemesi qoıǵan. Músin arnaıy mamandar qolymen daıyndalǵan. Degenmen onyń syrtqy túr sıpatyna baılanysty qalalyq turǵyn úı kommýnaldyq sharýashylyǵy tarapynan synı pikirler aıtylǵan soń, ol ornynan alynyp tastaldy», - dedi Qyzylorda qalalyq ishki saıasat bólimi.
Aıta keteıik, búginde Qyzylorda qalasynda 55 alleıa men skver, 69 tarıhı-mádenı eskertkish, qala mádenıeti men oblys ortalyǵynyń ásem kelbetin aıshyqtaıtyn 20-ǵa jýyq arhıtektýralyq músin bar.
