Qyzylorda 2 myń tonna baqsha ónimderin eksportqa shyǵarmaq
QYZYLORDA. QazAqparat - Ótken jyly aımaq baqsha ónimderin eksporttaýdy belsendi qolǵa alyp, shetelge 1 myń tonna ónim jóneltken, dep habarlaıdy QazAqparat tilshisi.
«Aǵymdaǵy jyly eksportqa 2 myń tonna baqsha ónimin shyǵarý josparlanýda. Biz qazir baqsha daqyldary men maıly daqyldar, sondaı-aq, kartop pen ónerkásiptik negizdegi kókónis ósirýdi ulǵaıtý boıynsha jumystar jasaýdamyz», - dedi oblys ákimi Qyrymbek Kósherbaev oblystyq máslıhat sessııasynda jasaǵan baıandamasynda.
Ákimniń aıtýynsha, ónimderdi óndirýdiń negizgi úlesi usaq sharýashylyqtarǵa tıesili bolǵandyqtan aýyl sharýashylyǵy kooperatıvterin qurý jumystary belsendi atqarylýda. Qazirgi tańda oblysta 64 aýyl sharýashylyǵy kooperatıvi quryldy. Olar 1325 jeke qosalqy sharýashylyqtardyń basyn biriktirip otyr.
Aıta ketý kerek, syrtqy naryqqa shyǵarylatyn eksporttyń negizgi ónim túrlerin kúrish pen balyq quraıdy. Tek sońǵy tórt jyldyń ishinde kúrish eksporty 28 paıyzǵa, al, balyq 8 paıyzǵa ósken.
«Agrokartada» belgilengen sharalardy júzege asyrý nátıjesinde 2020 jylǵa qaraı aýyl sharýashylyǵy ónimderiniń jalpy kóleminiń ósimi 2,4 esege nemese 213 mlrd teńgege artatyn bolady», - dep atap ótti ákim.
