Qyzylqaq aýylyndaǵy quqyq qorǵaýshylar men aýyl turǵyndary kóldegi shaıan úshin qaqtyǵysqan
PAVLODAR. QazAqparat - Pavlodar oblysynyń ishki ister departamenti 14 qyrkúıek kúni Qyzylqaq aýylynda oryn alǵan quqyq qorǵaýshylar men jergilikti turǵyndar arasyndaǵy «tóbeleske» qatysty túsinikteme berdi.
Jergilikti buqaralyq aqparat quraldaryna suhbat bergen oblystyq ІІD basshysynyń birinshi orynbasary Nazymbek Júnisov bul oqıǵaǵa qatysty oıyn aıtty.
Onyń deregine súıensek, Ertis aýdanyndaǵy tuzdy kóldi tekserý úshin Uıymdasqan qylmysqa qarsy kúres basqarmasy men Jedel áreket etetin jasaq qyzmetkerleri oqıǵa ornyna jóneltilgen eken. Onyń aıtýynsha, 11 qyrkúıek kúni Qyzylqaq kóliniń mańynda ashýǵa bulyqqan aýyl turǵyndary kóldegi artemııa shaıanyn aýlýǵa erkin ruqsat berýdi talap etken.
«Aýyl turǵyndaryna bul árekettiń zańsyz ekeni aıtylǵan. Alaıda, aýyl turǵyndarynan quralǵan bir top adam shaıan aýlaýyn toqtatpaǵan. 14 qyrkúıek kúni aýdanǵa polıtsııanyń qosymsha kúshi jiberildi. Qyzylqaq aýylyna barǵanda, polıtsııanyń aldynan 20-25 adam shyǵyp, quqyq qorǵaýshylardy «qorqytyp», kóldegi kúzetti alyp tastaý týraly ýltımatým qoıǵan. Polıtsııa olardy qolǵa túsirerde, bir adam qashyp ketip, tyǵylýǵy tyrysqan. Ony ustaý barysynda sambo ádisi qoldanyldy. Ekinshi adam mototsıkl minip qashamyn dep, mototsıklynan qulady da jaraqat aldy»,-dep túsindirdi oblystyq ІІD basshysynyń orynbasary.
N.Júnisovtyń aıtýynsha, quqyq qorǵaýshylar qarsylyq tanytqan adamdarǵa ǵana kúres ádisterin qoldanǵan.
«Sol kúni QR Qylmystyq kodeksiniń 379 baby, 1 tarmaǵy, ıaǵnı «Bılik ókiline baǵynbaý» baby boıynsha kózdelgen qylmysqa qatysty sot aldy tergeý bastaldy. Tergeý ádil ári ashyq bolmaq»,-dedi ol.
Buryn habarlaǵanymyzdaı, osy oqıǵadan keıin jergilikti aýrýhanaǵa bes adam kómek surap barǵan.
