«Qyzylaǵashtaǵy qyrǵynǵa kim kináli?» - respýblıkalyq basylymdarǵa sholý

Memleket basshysy Nursultan Nazarbaev Almaty oblysynyń Aqsý aýdanyndaǵy "Qyzylaǵash" sý qoımasynda oryn alǵan apatty joıý máselesin talqylaǵan jumys babyndaǵy keńes ótkizdi. Keńeske Premer-Mınıstr K.Másimov, Prezıdent Ákimshiliginiń Basshysy A.Mýsın, Bas prokýror K.Mámı, sondaı-aq Úkimet músheleri qatysty. Tolyǵyraq «Egemen Qazaqstan» basylymynyń búgingi sanyndaǵy «Jumys babyndaǵy keńes ótkizdi» degen taqyryppen berilgen maqaladan oqyńyzdar.

TÚRKSOI halyqaralyq uıymy kórnekti ǵalym, belgili qoǵam qaıratkeri Ahmet-Zákı Ýálıdı Toǵannyń túrki mádenıeti men tarıhyn zertteýge sińirgen eńbegi úshin 2010 jyldy - "Ahmet-Zákı Ýálıdı Toǵan jyly" dep jarııalaǵan-dy. Almatyda TÚRKSOI - Túrkitildes elder mádenıet mınıstrlikteriniń turaqty keńesi, QR Ulttyq kitaphanasy jáne Almaty qalasy ákimdiginiń uıymdastyrýymen "Túrki halyqtarynyń tarıhy men mádenıeti Ahmet Zákı Ýálıdı Toǵan zertteýlerinde" atty dóńgelek ústel ótip, oǵan otandyq belgili tarıhshy ǵalymdar, bashqurtstandyq zertteýshiler men Túrkııadan arnaıy kelgen ǵalymnyń balasy Súbedeı Toǵan qatysyp, ǵalymnyń qaıratkerlik, ǵylymı qyzmeti men muralary keńinen sóz boldy. Atalǵan taqyrypty arqaý etken maqala «Egemen Qazaqstan» gazetiniń búgingi sanynda «Túbi bir túrkiniń Toǵany» degen atpen jaryq kóripti. «Iá, bizder týys elmiz. Endeshe, Ahmet-Zákı Ýálıdı bastap mura etip qaldyryp ketken eki halyqtyń arasyndaǵy ózara yqylas, ózara jylylyq, qoldaý­shylyq dástúrdi saqtap, odan ári jalǵastyrýymyz kerek»,-deıdi basylym.

***

«Tynysh uıqyda jatqan Qyzylaǵash aýyly oıanýǵa da shamasy kelmesten, bir tún ishinde jermen-jeksen boldy. Qazir aýyldyń úshten ekisi joq. 17 kósheniń bireýi ǵana áýpirimmen aman qaldy deýge keledi. áıtpese onyń da saý-tamtyǵy joq. Syıymdylyǵy 40 mln tekshe metr sý qoımasyna 42 mln tekshe metr sý jınalsa, qoısyn ba, qopardy da ketti. Jeke qamyn ǵana oılaıtyn jekemenshiktiń jetkizgen jeri osy»,- dep jazdy «Aıqyn» basylymynyń búgingi sany. Aýyl turǵyndary «bas bolady» dep sengen ákim de, turǵyndardyń aıtýynsha, qaýip sezilisimen, halqyn tastap taıyp turǵan. Bul týraly tolyǵyraq gazettegi «Qyzylaǵashtaǵy qyrǵynǵa kim kináli?» atty maqaladan oqısyzdar.

«Qazaqstandyq joǵary bilim Eýropada moıyndalady». Osy taqyryppen jaryq kórgen «Aıqyn» gazetindegi kelesi jarııalanymda Bilim jáne ǵylym mınıstri J. Túımebaev atalǵan máselege qatysty túsinikteme beripti. Qazaqstandyq joǵary bilimdi halyqaralyq bilim keńistigimen ushtastyrýdyń qajettiligi men mańyzy qanshalyqty? Osy jáne ózge de mańyzdy máselelerge jaýap izdeseńiz gazettiń búgingi sanyna nazar aýdaryńyz.

Atalmysh basylymnyń búgingi sanynda «Tastan jasalǵan bastar» atty qyzyqty maqala jaryq kóripti. Maqalada Qazaq dalasynyń eń bir kóz tartar jerleriniń biri - Pavlodar oblysy Baıanaýyl taýlaryndaǵy talaı ǵasyrlar boıy daýyl, jelmen jáne jańbyr, qar sýymen mújilý nátıjesinde ǵajaıyp keskinderge aınalǵan, keıbir kezde janýarlarǵa, adamdarǵa uqsaıtyn shyńdar men pishinder jaıynda áńgime qozǵalypty.

***

BUU-nyń «Halyqaralyq Naýryz kúni» atty qarary qabyldanysymen, osy bir merekeniń túp tarıhyn zertteý qyzý qolǵa alyna bastady. Óıtkeni, halyqaralyq uıym qabyldaǵan kez kelgen qujatpen tanysý - oǵan múshe memleketterdiń aınymas mindeti. Osyǵan oraı «Astana aqshamy» basylymynyń búgingi sanynda Túrkitildes elderdiń Parlamenttik Assambleıasynyń múshesi Amangeldi Momyshev Naýryzǵa qatysty oı-pikirin oqyrmanmen bólisipti. Tolyǵyraq gazettegi «Naýryzdy jyl basy retinde jańǵyrtý kerek» degen taqyryptaǵy suhbatqa nazar aýdaryńyz.

Prezıdenttiń Mádenıet ortalyǵynda «Qazaq áýenderi» AQ-nyń uıymdastyrýymen uly ǵalym, aǵartýshy, tarıhshy, saıahatshy-geograf Shoqan Ýálıhanovtyń 175 jyldyq mereıtoıyna arnalǵan «Keń dalanyń kemeńgeri» atty ádebı-shyǵarmashylyq kesh ótti. Qatysýshy kórermenderge ǵalymnyń ómirlik joly men shyǵarmashylyǵynan syr shertetin rýhanı keshtiń ashylýynda Mádenıet mınıstri Muhtar Qul-Muhammed sóz aldy. Keshtiń egjeı-tegjeıin «Astana aqshamy» gazetiniń búgingi sanyndaǵy «Keń dalanyń kemeńgeri» degen atpen berilgen maqaladan oqı alasyzdar.

Búginde álem elderiniń birazy aspanmen talasqan záýlim ǵımarattar salýdy izgi maqsatqa aınaldyryp otyr. Álemniń jeti keremetindeı bolmasa da, óte bıik jáne erekshe pishinmen kóz tartyp, súıindirip turatyn mundaı munaralar qaı qalanyń bolmasyn ajaryn ashyp, aıshyqtap turǵany ras. «Astana aqshamy» gazetiniń búgingi sanyndaǵy «Dýaly bıik Dýbaı» atty kelesi maqala sońǵy jyldary úlken eńbekpen talǵamnyń arqasynda dúnıege kelgen alyp ǵımarattardyń biri «Dýbaı» týraly jazypty.

***

«Alash aınasy» basylymynyń búgingi sanynda «Almatyny tasqynnan qutqaratyn karta áli jasalmapty» atty maqala jaryq kóripti. Aty aıtyp turǵandaı, maqala birneshe taý ózeni kesip aǵyp jatqan, kóktem kelisimen topan sý qaptaý qaýpi basym Almaty qalasyna alańdaýshylyq bildiripti. «Topan sý kezinde Almaty halqyn qaýipsiz aımaqqa kóshirýdiń kartasy turǵyndar túgil, tótenshe jaǵdaılarǵa jaýapty mamandardyq qolynda da joq eken. Qalalyq tótenshe jaǵdaılar jónindegi departamentte plotınalar jarylý kezinde turǵyndardy zvakýatsııalaýdyń kartasyn jasaý isi Qyzylaǵashtaǵy qaraly oqıǵadan keıin ǵana qolǵa alynyp otyr», - deıdi basylym.