Qyzylaǵash sý qoımasy bıyl iske qosylady
TALDYQORǴAN. QazAqparat - Almaty oblysynda osydan 10 jyl buryn bógeti jarylyp, isten shyqqan Qyzylaǵash sý qoımasy qalpyna keltirildi. Bıyl bul sý qoımasynan Aqsý aýdanynyń sýarmaly alqaptaryna tirshilik nári jiberiledi, dep habarlaıdy QazAqparat tilshisi.
Qyzylaǵash sý qoımasyn qalpyna keltirý jumystary 2016-2019 jyldary aralyǵynda júrgizildi. Joba quny 5,6 mlrd teńge. Bas merdiger «QazSýShar» RMK Almaty fılıaly. Qazirgi tańda barlyq mehanıkalyq jumystar aıaqtaldy. Aldaǵy ýaqytta avtomattandyrý boıynsha jabdyqtar ornatylmaq.
«Bıiktigi 55 metr bóget salynyp, barlyq talaptarǵa saı bekitildi. Sýqoıma janynan jumysshylarǵa eki páterli eki úı jáne tómendegi sý taratý torabynan eki páterli eki úı salyndy. Qyzylaǵashtyń jalpy syıymdylyǵy 42 mln tekshe metr. Bıyl 20 mln tekshe metr sý jınap, Aqsý aýdanynyń 4 myń gektar alqabyn sýmen qamtamasyz etý josparlanǵan», - deıdi «QazSýShar» RMK Almaty fılıaly basshysy Smaıyl Kýmetov.
Esterińizge sala keteıik, 2010 jyly naýryzdyń 11-nen 12-ine qaraǵan túni tolassyz jaýǵan qar men jańbyr saldarynan Qyzylaǵash sý qoımasy jarylyp, Qyzylaǵash aýylyn shaıyp ketken edi. Qaıǵyly oqıǵa saldarynan 45 adam qaza taýyp, 460-tan astam úı jermen-jeksen boldy. Qazaqstan halqynyń uıymshyldyǵy men óńir basshylyǵynyń jedel áreketiniń arqasynda jańadan úıler salynyp, turǵyndar 1,5-2 aıdyń ishinde qaıta aýylǵa oraldy.
