Qyzylaǵash qalypty ómirge oralýda

Keshe Almaty oblysynyń ákimi Serik Úmbetov taǵy 200 turǵynǵa jańa úıdiń kiltin tapsyrdy. Bunyń 188-i Qyzylaǵashta, 12-si Aqtoǵanda. Buǵan deıin 19 mamyr kúni 188 qyzylaǵashtyq, 6 aqtoǵandyq barlyǵy 145 turǵyn jańa úıge kirgen edi. Búgingi kúnge deıin 345 jańa baspana paıdanaýǵa berilgen. Barlyq úıler zamanýı talapqa saı salynyp, 25 túrli múlik pen úı qajettilikterimen qamtamasyz etilgen.

Oblys ákimi Serik Úmbetovtyń aıtýynsha, Qyzylaǵash aýylyndaǵy qalǵan úıler men qoǵamdyq nysandar osy aıdyń aıaǵynda, qalǵan eki aýyldaǵy nysandar shilde aıynyń aıaǵyna deıin salynyp bitedi. Bul eki aýyl boıynsha qazirgi kezde Aqtoǵanda salynýy tıis 56 úıdiń 18-iniń qurylysy aıaqtalyp, 21 úıge kúrdeli jóndeý jasalǵan. Sondaı-aq 3,5 shaqyrymdyq sý qubyry tartylyp bitken. Aldaǵy ýaqytta jańa feldsherlik pýnkt salynbaq. Al Eginsýda 21 úıdiń qurylysy men 54 úıdiń kúrdeli jóndeýi jalǵasýda. 640 oryndyq mektep pen 90 balaǵa laıyqtalǵan balabaqshaǵa kúrdeli jóndeý jasalýda. 3 aýylda da 500-den astam tehnıka men 4000-nan astam adam jumyldyrylǵan 69 merdiger kompanııa jospar boıynsha qyzý qurylys júrgizip jatyr. Turǵyndardyń kóńili toq. Shyǵyny kóp Qyzylaǵashta 12 naýryzdaǵy qaıǵynyń izi qalmaǵan. Qazekem aıtatyn tiri adamnyń tirshiligi jalǵasýda. Turǵyndar Elbasy men Úkimetke, oblys ákimi men onyń komandasyna sheksiz rızamyz desedi. Óıtkeni qoldanýǵa berilgen úıler qazirgi zaman talabyna saı. Barlyq kóshe asfalttalyp, buryn- sońdy bolmaǵan jaıaý júrginshiler joly jasalǵan, sý tartylyp, kósheler túgel kógaldandyrylý ústinde. Oblys ákimi Qyzylaǵashqa 15 myń túp aǵash otyrǵyzylyp, saıabaq boı kóteretinin aıtady. Bunymen qatar aýyl tolyǵymen jaryqtandyrylyp, telefon baılanysy ornatylmaq. Aýrýhana, mádenıet úıi, monsha, balabaqsha da jańartylmaq. Qazirgi kezde bul nysandar kúrdeli jóndeýden ótkizilýde. Jóndeý aıaqtalǵan soń mektep janynda jańa stadıon paıdalanýǵa berilip, burynǵy mektep-ınternat ǵımaratynyń 1, 2 qabaty balabaqshaǵa, 3-shi qabaty 12 páterli turǵyn úıge aınalady. Aýylda qurylys jumystarymen qatar egis naýqany da nazardan tys qalmaǵan. Qazirgi kezde 1000 gektar jerge bıdaı, 1000 gektar jerge arpa sebilgen. Kúzde alynǵan ónim turǵyndarǵa taratylyp berilmek. Aldaǵy ýaqytta qurylys jumystary aıaqtalsa turǵyndarǵa mal alýǵa da kómek kórsetiletin bolady. «Turǵyndardyń tirkeý kitapshasy arqyly mal sanyn anyqtap, mal alý úshin aqshalaı kómek beriletin bolady. Bunymen qatar oblystyń ár aýdanyna tasqynnan zardap shekken 40-50 januıadan bólip berip otyrmyz. Aýdandardan jalpy alǵanda 6 myń qoı, 500 jylqy, 500 sıyr keledi. Bular turǵyndarǵa taratylyp beriledi», deıdi Serik Úmbetov.

Bul tasqynnan aman qalǵandardyń keship jatqan tirligi. Al sol apat kezinde opat bolǵandar da umytylmaq emes. Qazirgi kezde músinshi Qabı Baýlyqovtyń jasaǵan jobasy bekitilip, daıyndalýda. Eskertkishte ananyń sýdan qaıda qasharyn, qalaı qutylaryn bilmeı alasurǵan beınesi beınelengen. Tolqyndar qorshaýyndaǵy ananyń balasyn qushqan kúıi jalǵyz aǵashqa jarmasqan kúıi kórinis tapqan. Beton men granıtten jasalatyn eni 14, bıiktigi 7 metr eskertkish Almaty-Óskemen tas jolynyń ońtústik betkeıine qoıylmaq. Bul eskertkish jyl saıyn naýryzdyń 12-si kúni apatqa dýshar bolǵandardyń árýaǵyna quran baǵyshtap, eske alatyn orynǵa aınalmaq. Oblys ákiminiń aıtýynsha, barlyq jumystarǵa qarjy jetkilikti, shashaý shyqpaı ornymen jumsalýda. 4 maýsymdaǵy málimet boıynsha sý tasqynynan zardap shekken aýyldarǵa kómek retinde jınalǵan qarjynyń kólemi 7 mıllıard 393 mıllıon teńgeni qurap otyr.

Kózben kórgen qazirgi Qyzylaǵashtyń hali osy. Jalpy aýyl túgeldeı jańaryp, jasarýda. Shildeniń sońynda barlyq qurylys bitse, osydan 2 aı burynǵy sý shaıyp, qaıǵy jamylǵan aýyldyń ornynan zamanaýı talapqa saı, jańarǵan, jasarǵan aýyldy kórýge bolady.