Qyzylaǵash aýylyn qalpyna keltirý jumystary Elbasynyń jeke baqylaýynda boldy - Almaty oblysy ákiminiń orynbasary
TALDYQORǴAN. Qyrkúıektiń 22-si. QazAqparat /Sandýǵash Dúısenova/ - Búgingi tańda sý tasqynynan zardap shekken Qyzylaǵash aýyly men onyń turǵyndarynyń ómirin qalpyna keltirý boıynsha atqarylatyn jumystar aıaqtaldy.
Bul týraly shtabtyń qorytyndy otyrysy barysynda Almaty oblysy ákiminiń birinshi orynbasary Amandyq Batalov málim etti.
«Mektep, meshit, aýdandyq ishki ister bóliminiń tirek pýnkti, «Qazposhta» AQ bólimi, aýyl ákimdigi men Mádenıet úıiniń ǵımaraty kúrdeli jóndeýden ótti. 120 orynǵa arnalǵan jańa balabaqsha ashyldy, «Rahat» AQ-men birlese otyryp aýyldyq dárigerlik ambýlatorııa qatarǵa qosyldy. Qazaqstan halqy Assambleıasynyń kómegimen qoǵamdyq monsha men sportzal salyndy», - dedi ákim orynbasary.
A.Batalovtyń sózine qaraǵanda, Aqtoǵan aýylynda 56 úı jańadan salynsa, 21 turǵyn úı kúrdeli jóndeýden ótti. Mekteptegi jóndeý jumystary aıaqtaldy. Eginsý aýylynda 21 úı salynyp, 54 úıge kúrdeli jóndeý jumystary júrgizildi. 640 oryndyq mekteptiń, 90 búldirshinge arnalǵan balabaqshanyń, kitaphana, aýyl ákimdigi ǵımaratynyń jóndeý jumystary tolyqtaı bitti. Medıtsınalyq pýnkttiń qurylysy 2010 jylǵy qazannyń 27-de aıaqtalady dep kózdelip otyr.
Búgingi tańda zardap shekken aımaq pen onyń turǵyndarynyń ómirin qalpyna keltirý boıynsha atqarylǵan jumystary aıaqtaldy. Bul jumystardyń barlyǵy Prezıdentimiz Nursultan Ábishuly Nazarbaev pen Qazaqstan Respýblıkasy Úkimetiniń jeke baqylaýynda boldy, dep atap ótti A.Batalov.
