Qyzylaǵash aýyly ákiminiń basy daýǵa qaldy
TALDYQORǴAN. QazAqparat - Almaty oblysyndaǵy Qyzylaǵash aýyly ákiminiń basy daýǵa qaldy. Sharýa qojalyǵynyń basshysymen dóreki sóılesip, balaǵattaǵan ákim Sáýle Amıtova bul joly tek eskertýmen qutylyp otyr, dep habarlaıdy QazAqparat tilshisi.
Ákimniń ústinen A.A. esimdi azamatsha Almaty oblysyndaǵy Ádep jónindegi keńeske aryzdanǵan. Shaǵymdanýshy aýyl ákiminiń dórekiligin dáledeıtin aýdıojazbany da usynǵan. Aýdıo jazbany tekserý barysynda Aqsý aýdany Qyzylaǵash aýyldyq okrýginiń ákimi S.Amıtovanyń sharýa qojalyǵy basshysymen daýlasqandyǵy anyqtaldy. Ekeýiniń bir-birine beıádep sózder aıtyp, balaǵattaǵandary da belgili boldy. Bir qyzyǵy bul jerde sharýa qojalyǵynyń basshysy emes, osy jaıtqa kýá bolyp, jaǵdaıdy aýdıojazbaǵa jazyp alǵan úshinshi adam shaǵymdanǵan eken.
Іsti qaraý nátıjesinde keńes músheleri ádep kodeksiniń talaptaryn buzǵany úshin Aqsý aýdany Qyzylaǵash aýyldyq okrýginiń ákimi S.Amıtovaǵa «qyzmetine tolyq sáıkes emestigi týraly eskertý» túrindegi tártiptik jaza qoldanýdy usyndy. Jaǵdaı qaıtalansa, ákimniń birden jumystan ketetini qatań eskertildi.
Aıta keteıik, bul Almaty oblysyndaǵy alǵashqy jaıt emes. Buǵan deıin Qapshaǵaı qalasynyń burynǵy ákimi Sátjan Qıqymov jergilikti turǵynmen óktem sóılesip, dórekilik sózi úshin óz erkimen jumystan ketýge májbúr bolǵan edi.
Sýret ǵalamtordan alyndy
