Qyzyl jegi aýrýy juǵa ma – dáriger jaýaby
Dárigerdiń sózinshe, júıeli qyzyl jegi - sozylmaly aýtoımmýndy aýrý, ol aǵzaǵa, ásirese terige, býyndarǵa, qantúzilim júıesine, búırekke jáne ortalyq júıke júıesine áser etýi múmkin.
Ol juqpaly aýrý emes.
Aıtýynsha, atalǵan dertke shaldyqqan naýqasta dene qyzýynyń birtindep ne turaqty túrde kóterilýi, salmaq tastaý jáne tábettiń joǵalýy baıqalady.
Kóbinese aýrý terige jáne shyryshty qabattarǵa áser etedi. Ártúrli teri bórtpeleri, fotosensıbılızatsııa (kún sáýlesiniń áserinen bórtpe paıda bolýy), muryn nemese aýyz qýysynda jaralar paıda bolady.
Muryn men shekege «kóbelek» túrinde bórtpeler shyǵady. Keıde shash kóp túse (alopetsııa) bastaıdy. Qoldar qyzyl, sodan keıin aq, sýyqqa shyqqan kezde kók bolady.
Aýrý belgileri – býyndardyń isinýi men qattylyǵy, bulshyqet aýrýy, anemııa, kógerýdiń paıda bolýy, bas aýrýy, qurysýlar jáne keýdede aýyrsyný bolady.
Búırektiń aýyr zaqymdanýynyń eń jıi kezdesetin belgileri – qan qysymynyń joǵarylaýy, aqýyzdyń bolýy, zárdegi qan, sondaı-aq aıaqtyń jáne qabaqtyń isinýi.
Kardıologııa jáne ishki aýrýlar ǴZI revmatolog dárigeri Marjan Abdýllaevanyń aıtýynsha, emdeýshi dáriger taǵaıyndaǵan dári-dármek qabyldaý jegi belgilerin baqylaýǵa kómektesedi. Zerthanalyq zertteýler dıagnoz qoıýǵa jáne aýrýdyń qandaı ishki organdarǵa áser etetinin anyqtaýǵa kómektesedi.
«Denim saý bolsyn degen ár adam aýrýdyń aldyn alý úshin dárigerge qaralýy kerek. Aýrýdy erte anyqtap, erte kúresse qyzyl jegini emdeý nátıjesi jaqsarady. Ony steroıdty emes qabynýǵa qarsy preparattardy, gıdroksıhlorohındi, kortıkosteroıdtardy, tsıtostatıkterdi, gendik-ınjenerlik bıologııalyq preparattardy qoldaný arqyly emdeýge bolady. Eger dıagnoz erte qoıylsa jáne patsıent tıisti em alsa, onda aýrý ádette keri ketedi jáne remıssııaǵa aýysýy múmkin. Alaıda, júıeli qyzyl jegi boljanbaıtyn sozylmaly bolǵan soń naýqastar medıtsınalyq baqylaýda bolyp, únemi dári-dármekter qabyldaýy kerek», - deıdi Marjan Abdýllaeva
Sonymen qatar, dáriger aýrýdyń beti qaıta bastaǵan kezden turaqty túrde jattyǵýlar jasap, durys tamaqtanýǵa keńes berdi.
«Jaıaý júrý, velosıped tebý, júzý jáne basqa aerobty sport túrleri nemese ashyq aýada jıi serýendegen jón. Qyzyl jegimen aýyratyn naýqastar durys tamaqtanýy kerek. Aýrý órship ketpes úshin naýqas kún sáýlesinen qorǵaıtyn jaqpa jaǵyp, vırýstyq ınfektsııalar, stress, gormonaldy jáne basqa da dári-dármekterden aýlaq bolǵany jón»,- dedi revmatolog.
Foto: Getty Images
