«Qyzyl» mártebesin buzǵan 356 turǵynǵa aıyppul salyndy - Aqmola oblysy
Aqmola oblysy sanıtarlyq-epıdemıologııalyq baqylaý departamenti baspasóz qyzmetiniń málimetinshe, Ashyq jobasy arqyly óńirde úı karantınin buzǵan 1804 kelýshi anyqtalǵan. Olardyń ishinde 1369 adam «qyzyl» mártebege ıe (juqtyrǵan), 435 adam «sary» mártebege ıe (jaqyn baılanysta bolǵan).
«Jalpy, «qyzyl» mártebesi bar 356 adamǵa aıyppul salyndy. «Qyzyl» mártebesi bar jeke tulǵalarǵa qatysty úıde oqshaýlaýdy buzǵany úshin sanıtarııalyq qyzmet mamandary Ákimshilik quqyqbuzýshylyq kodeksiniń 425-baby «Halyqtyń sanıtarlyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha ákimshilik hattama toltyrdy. Osy baptyń sanktsııasy jeke tulǵalar úshin 30 aılyq eseptik kórsetkish (87 510 teńge) mólsherinde aıyppul salýdy kózdeıdi», - dep atap ótti vedomstvoda.
Eske sala ketsek, óńirde Ashyq jobasy boıynsha 4330 qatysýshy, onyń ishinde 88 joba kóshbasshysy jumys isteıdi. Baǵdarlamadan 212 josyqsyz qatysýshy alynyp tastaldy. Óńirdiń sanıtarlyq dárigerleri ambýlatorııalyq emdelýde júrgen aqmolalyqtarǵa ózin-ózi oqshaýlaý rejımin buzbaýǵa jáne qoǵam aldynda azamattyq jaýapkershilik tanytýǵa shaqyrady. Koronavırýspen aýyratyn naýqastarmen baılanysta bolǵan adamdar ózin-ózi oqshaýlaý rejımin ustanýy jáne basqa adamdardyń juqpaýyn boldyrmas úshin kóp jınalatyn jerlerge barýdan bas tartýy kerek.
