Qyzyl kitapqa engen Qarataý arqaryn atqan brakoner qolǵa tústi

ASTANA. QazAqparat - Qyzyl kitapqa engen Qarataý arqaryn aýlaǵan brakoner ustaldy. Bul týraly QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet aıtty, dep habarlaıdy QazAqparat tilshisi.

«2019 jylǵy 26 qańtarda Qarataý memlekettik tabıǵı qoryǵynyń ınspektorlary qoryqqa qarasty Qursaı saıynda Kentaý qalasynyń turǵynyn (Ó.B. 1981 j.t.) QR Qyzyl kitabyna engen Qarataý arqaryn zańsyz atqany úshin ustady», - dep jazdy Sáken Dildahmet Feısbýktegi paraqshasyna.

Onyń aıtýynsha, oqıǵa ornynan soıylǵan urǵashy Qarataý arqarynyń eti men terisi, odan bólek, qujaty joq myltyq pen eki dana oq tabyldy.

Atalǵan fakti boıynsha qylmystyq is qozǵaldy. Aldyn ala esep boıynsha, keltirilgen shyǵynnyń somasy 17 043 750 teńgeni quraıdy.

Jazbada kórsetilgendeı, Qyzyl kitapqa engen Qarataý arqaryna keltirilgen shyǵynnyń kólemi 500 AEK quraıdy. Zań buzýshylyq erekshe qorǵalatyn tabıǵı aýmaqta oryn alsa, shyǵyn úsh eselenedi.