«Qyzyl» aımaqtaǵy SQO-ǵa ókpeni jasandy jeldetetin 77 apparat jetkizildi
NUR-SULTAN. QazAqparat – «Qyzyl» aımaqta turǵan Soltústik Qazaqstan óńirine ókpeni jasandy jeldetetin 77 apparat jetkizildi, dep habarlaıdy QazAqparat tilshisi QR IIDM baspasóz qyzmetine silteme jasap.
QR Densaýlyq saqtaý mınıstrligi bekitken qujatqa sáıkes, Soltústik Qazaqstan oblysyna «Biyovent» ókpeni jasandy jeldetý apparatynyń 77 danasy jetkizilgen. Sondaı-aq, medıtsına mamandarynyń usynystaryn eskere otyryp, barlyq 77 ÓJJ apparaty kompressorlarmen jáne aýany ylǵaldandyratyn qondyrǵylarmen qosymsha jaraqtandyrylǵan.
«Atalǵan ónim Dárilik quraldar memlekettik tiziliminde tirkelgen, sonymen qatar tirkeý kýáligin alǵan (2020 jylǵy 12 qyrkúıektegi RK-MT-5 № 021003). Barlyq ÓJJ apparatyna kepildik berilip, 37 aı boıyna servıstik qyzmet kórsetiledi», - dep habarlaıdy mınıstrlikten.
Jalpy búginge deıin Qazaqstannyń barlyq óńirine 1 500 dana «Biyovent» ÓJJ apparaty jetkizilgen.
