«Qyzyl» aımaqtaǵy Pavlodardyń aýyldyq jerlerinde koronavırýs órship tur
Bul jaıynda oblys ákimdigi baspasóz qyzmetiniń Telegram paraqshasynan málim boldy.
Sanıtarlyq-epıdemıologııalyq baqylaý departamentiniń basshysy Batyrbek Álıevtiń habarlaýynsha, 4-10 qańtar aralyǵynda óńirde koronavırýstyń - 549, 11-17 qańtar aralyǵynda - 616 oqıǵasy tirkelgen.
Aýrý odan ári taralmas úshin sanıtar dárigerler qoǵamdyq tamaqtaný oryndarynyń, SPA-ortalyqtardyń, fıtnes-zaldardyń, bazarlardyń, saýda-saýyq keshenderiniń, saýda úıleriniń, azyq-túlik satpaıtyn dúkender men qoǵamdyq kóliktiń jumys rejımine qatysty qosymsha shekteý sharalaryn engizdi.
Olar 20 qańtardan bastap áreket ete bastaıdy.
- Qandaı shara qoldansańyzdar da, osy sharalardyń saqtalýy tıisti dárejede baqylanbasa, qajetti nátıje kútýdiń qajeti joq. Biz monıtorıng tobynyń sanyn arttyrdyq, biraq ázirge olardyń tıimdiligi kóńil kónshitpeıdi. Barlyǵyn jappaı tekserýdiń qajeti joq, epıdrejım buzylatyn jerlermen jumys jasańyzdar,-dedi oblys ákimi Ábilqaıyr Sqaqov.
Óńir basshysy shtab músheleriniń nazaryn aýyldyq jerlerde syrqattyń órshýine aýdardy.
Ótken aptada keıbir aýdandarda koronavırýs ınfektsııasyna shaldyqqan 30-ǵa jýyq adam tirkeldi.
Aýdan ákimderi muny COVID-19 juqtyrǵandarmen jıi baılanysta bolǵan adamdarda anyqtalyp jatqanymen túsindirdi.
Alaıda Ábilqaıyr Sqaqov bul jaǵdaıdy jergilikti atqarýshy organdar tarapynan kemshilikter oryn alyp otyrǵanynan dep esepteıdi.
- Bizge óńirlik matrıtsany engizý qajet, soǵan sáıkes árbir ákimshilik aýmaqty jeke qarastyramyz. Tez arada biz óz baǵalaýymyzdy júrgizý úshin árbir qala men aýdanǵa jańa tásilderdi túsindirińizder. Sonda biz ár «qyzyl» aımaqpen jeke jumys istep, naqty nátıjeli sharalar qabyldaımyz, - dep tapsyrdy ol.
Pavlodar, Ekibastuz jáne Aqsý ákimderine sanıtarlyq-epıdemıologııalyq talaptardy saqtaı otyryp, qalaishilik jolaýshylar tasymalynyń jumysyn tıimdi jolǵa qoıý tapsyryldy.
Jalpy jergilikti jerlerdegi barlyq basshylardyń aldyna Ábilqaıyr Sqaqov syrqattyń taraý dınamıkasyn tómendetý mindetiniń mańyzyn birinshi kezekke qoıdy.