«Qyzyl» aımaqtaǵy Nur-Sultan: Qalanyń bas sanıtary turǵyndarǵa saq bolýdy eskertti
«Qyzyl» aımaqtaǵy epıdemıologııalyq ahýal
Jalpy Nur-Sultan qalasynda 2020 jylǵy 13 naýryz ben 10 jeltoqsan aralyǵynda 16 880 adam COVID-19 vırýsyn juqtyrǵan. Onyń ishinde 10440 aýrý belgileri bar bolsa, 6440 sımptomsyz naýqastar. Qala boıynsha syrqattanýshylyq kórsetkishi ortasha respýblıkalyq kórsetkishten 1,9 ese joǵary jáne 100 myń halyqqa shaqqanda 1461,2-ni quraıdy. 16 880 jaǵdaıdyń 416–y syrttan kelgender, 11534-i jergilikti turǵyndar bolsa, 4930-i baılanysta bolǵan adamdar.
«15 583 adamnyń ambýlatorııalyq emdeýden ótip, aýrýhanadan jazylyp shyqty. 340 adam qaıtys boldy. 837 adam statsıonarlyq jáne ambýlatorııalyq em alýda. COVID-19 jaǵdaılary áli de tirkelip jatyr. Táýligine 50-den 120-ǵa deıin aýrý belgileri bar jaǵdaılar tirkeledi. Eresekter, mektepke deıingi jáne mektep jasyndaǵy balalar arasynda da juqtyryp jatqandar bar», - dedi Janna Pralıeva qala ákimdiginiń baspasóz ortalyǵynda.
Bir qıyny, jazben salystyrǵanda 14 jasqa deıingi balalar arasynda COVID-19 vırýsyn juqtyrǵandar sany 7%-ǵa deıin, jasóspirimder 1,4%-ǵa deıin jáne 50 jáne odan joǵary jastaǵy adamdar arasynda 37%-ǵa deıin óskeni baıqalyp otyr.
«Qyrkúıek aıynda jáne qazan aıynyń birinshi onkúndiginde qaladaǵy epıdemıologııalyq jaǵdaı turaqty dep baǵalandy. Biraq qazan aıynyń ekinshi jartysynan bastap reprodýktıvti sannyń (R) birlikten asyp ketýi baıqaldy. R sanynyń qazan aıynda 11 kún boıy jáne qarasha aıynda 6 kún boıy tómendedi. Qalǵan ýaqytta R sany 1-den asty, sondyqtan qala «sary aımaqta» boldy. Qazan aıymen salystyrǵanda ózdigimen medıtsınalyq qyzmetke qaralyp anyqtalǵandar (aptasyna 18-den 213 jaǵdaıǵa deıin) jáne úı oshaqtarynda qatynasta bolyp aýyrǵandar (aptasyna 15-ten 217 jaǵdaıǵa deıin) sany kóbeıgen. Ótken aptada syrqattaný kórsetkishi 100 myń turǵynǵa shaqqanda 51,0-den asqan. 10 jeltoqsannan bastap qala «qyzyl aımaqqa» aýysty. Bul birinshi kezekte qala turǵyndarynyń aldyn alý sharalaryn saqtamaýyna baılanysty bolyp otyr», - dedi ol.
10 jeltoqsanda COVID-19 vırýsyn 118 adam juqtyrypty. Kásibı quram boıynsha jumys istemeıtin 22, 13 zeınetker, jumys isteıtin 52, 3 medıtsına qyzmetkeri, 3 áskerı qyzmetker, 14 oqýshylar – 14, 1 stýdent koronavırýs juqtyrǵan.
Oqýshylardyń bári de qashyqtan oqýy múmkin
Janna Pralıevanyń sózinshe oqýshylar men oqytýshylar arasynda COVID-19 jaǵdaılarynyń tirkelýi kún saıyn jalǵasyp jatqandyqtan, menshik nysanyna qaramastan, mektepterdi qashyqtan oqytý júıesine kóshý máselesi qarastyrylýda. 10 jeltoqsandaǵy jaǵdaı boıynsha, aýdandyq sanepıdbaqylaý basqarmalarynyń Bas memlekettik sanıtarlyq dárigerleriniń qaýlylarymen 20 mektepte oqý protsesi 14 kúnge onlaın rejımge aýystyrylǵan.
Jalpy elordada oqý jylynyń basynan beri barlyǵy 224 oqýshy aýyrǵan. Onyń 179 – y qashyqtan (qaladan tys jerlerden kelgen oqýshylar sany - 15, onyń ishinde offlaın rejımde - 2) oqyǵandar. Mektep boıynsha barlyǵy 590 qatynasta bolǵan azamat tekserildi. 8 jaǵdaıda mektep oqýshylary jáne 1 jaǵdaıda oqytýshy qarym-qatynasta bolǵandyqtan aýyrǵan .
Qalada COVID-19 dıagnostıkasy boıynsha táýliktik qýattylyǵy 11 680 zertteý bolatyn 18 zerthana jumys isteıdi. Barlyq zerthananyń júktemesi 25-ten 40%-ǵa deıin, kúnine 4500-ge deıin zertteý júrgizedi.
«Koronavırýs juqtyrǵan azamattardy ýaqtyly anyqtaý maqsatynda PTR anyqtamasynsyz kelgen adamdar karantındik statsıonarǵa jatqyzylyp, olar qatań túrde tekserilip jatyr. Osy jyldyń 2 qazany men 10 jeltoqsany aralyǵynda 283 reıspen astanaǵa 35 450 adam keldi. Onyń ishinde teris PTR nátıjesi bar anyqtamamen 30 767 azamat jetti. Deportatsııalanǵandardyń sany 15. Karantındik statsıonarǵa jatqyzylǵandar jáne tekserilder – 4668. 22 sımptomsyz naýqas anyqtalyp onyń 4-i emdeýge jatqyzyldy», - dep atap ótti Janna Pralıeva.
Onyń aıtýynsha avtoótpe joldar arqyly basqa elderden kelgen adamdardyń densaýlyq jaǵdaıyna monıtorıng júrgizilýde. Qazan aıynan bastap elordaǵa avtoótpe joldar arqyly barlyǵy 4197 adam kelgen. Onyń ishinde avtoótpe joldar arqyly ótkenderdiń ishinen COVID-19 vırýsyn juqtyrýdyń 6 jaǵdaıy júk tasymaldaýshylar arasynda tirkelgen.
6 nysannyń jumysy 3 aıǵa deıin toqtatylýy múmkin
«Osy jyldyń 10 qarasha men 10 jeltoqsan aralyǵynda monıtorıng toptary shekteý jáne karantın sharalarynyń buzylýyna qatysty 158 shuǵyl habarlama jiberdi: Osylaısha Úılestirý ortalyǵynan shuǵyl habarlamalar kelip tústi. Jospardan tys tekserý nátıjeleri boıynsha jalpy somasy 28 933 070 teńge bolatyn 107 ákimshilik aıyppul salyndy (onyń ishinde bir nysandaǵy 4 qyzmetkerge aıyppul salynǵan). Kemshilikterdi retteý jóninde 105 nusqama berildi», - deıdi Janna Pralıeva.
Shekteý jáne karantın sharalarynyń «ádeıi buzǵandarǵa» qatysty nusqamany oryndamaǵany úshin Nur-sultan qalasynyń mamandandyrylǵan aýdanaralyq ákimshilik sotyna QR ÁQBtK-niń 462-babynyń 3-bóligi boıynsha 7 ákimshilik hattama jiberildi. Olar: «sova» karaoke barynyń, «Janym sol» karaoke-barynyń, «Alanya» túngi klýby, «Teqila» laýndj-bary, «Echo» bary, «Altyn» meıramhanasy. Ákimshilik kodekstiń 462-babynyń 3-bóliginiń sanktsııasy nysan qyzmetin toqtata otyryp, ákimshilik aıyppul túrindegi jaza berýdi kózdeıdi. Basqarma ókilderi joǵaryda atalǵan nysandardyń qyzmetin 3 aıǵa deıin toqtata turý túrinde qosymsha jaza sharasyn qoldaný týraly sotqa ótinish jasamaq.
Sóz sońynda Janna Pralıeva aldaǵy Táýelsizdik merekesinde elorda turǵyndary 4 kún demalatynyn, bul ýaqytty týystary men jaqyndarynyń ortasynda ótkizýge múmkindik alatynyn jetkizdi.
«Osy rette men Nur-Sultan qalasynyń Bas memlekettik sanıtarlyq dárigeri retinde elordanyń árbir turǵynyna óz densaýlyǵyńyz ben jaqyndaryńyzdyń densaýlyǵyn umytpaýǵa shaqyramyn», - dep túıdi qalanyń bas sanıtary.
