Qyzy tastap ketken jigit 30 mln. dollar utyp aldy
ASTANA. 20 qazan. QazAqparat - AQSh-tyń Massachýsets shtatynda turatyn Sandıp Sıngh lotoreıadan 30,5 mıllıon dollar jeńip aldy.
Mundaı qýanyshty jaıttyń aldynda ony qalyńdyǵy tastap ketken eken. Alaıda, jańa mıllıoner endi muńaımaıdy. Óıtkeni ol úshin jańa ómir bastaldy. Bul týraly BAQ.KZ portaly jazady.
«Iá, qalyńdyǵym menen bas tartyp, ary qaraı aralaspaıtyndyǵyn aıtty. Biraq bul jaıt meni qazir múldem alańdatpaıdy - dedi Sıngh jýrnalsıtermen bolǵan baspasóz májilisinde. - Alǵashynda júregim qatty jaralandy. Al qazir ol jaıynda múldem oılap jatqanym joq, men odan endi bir satyǵa joǵarymyn» dedi mıllıoner.
Sıngh sondaı-aq, óziniń 14 jastan bastap eki birdeı jumysty qatar istegenin málimdedi. Anasy men qaryndasyn asyraý úshin jáne marqum ákesiniń artynan qalǵan qaryzdardan qutylý úshin bozbala aýyr jumysqa jegilgen. Endi utyp alǵan aqshasyna ol otbasynyń jaǵdaıyn jaqsartyp, qalǵanyn qaıyrymdylyqqa jumsaıtyndyǵyn aıtty.
Jetkinshek alǵashqy lotoreıadan nebári 4 dollar ǵana utqan eken. Keıin bul aqshaǵa taǵy tórt bılet alyp, qaıta baǵyn synap kórgen. Nátıjesinde ol Mega Millions lotoreıasynyń jeńimpazy atanyp, 30,5 mln. dollardy enshiledi. Biraq, bul qarjy túgeldeı Sınghtyń qaltasyna túspeıtini belgili. Tıisti salyqtardy tólep bolǵan soń oǵan 16,1 mıllıon AQSh dollary tabys etilmek.
