Qyzýqandy jigit ákesiniń tanysyn kólikpen basqan
ASTANA. QazAqparat - Atalǵan oqıǵa Pavlodar oblysy Jelezın aýdanynda bolǵan, dep habarlaıdy QazAqparat tilshisi.
Ótken jyly Jelezın terrıtorıaldyq sot oryndaýshylary bóliminiń kólik júrgizýshisi kóshemen kele jatqanda ákesin kezdestirgen. Onyń janynda beıtanys bir er adam boldy. Ekeýi de mas kúıinde júrdi. Kólik júrgizýshisi ákesin úıge qaıtaramyn dep turǵanda beıtanys kisimen ustasyp qaldy. Ákesimen araq ishkeni úshin naryzylyq bildirdi. Sodan ekeýiniń arasynda janjal shyqqan. Ashýǵa mingen jigit kóligine otyryp, ákesiniń tanysyn basyp ketpekshi bolady. Úlken kisi soqqydan jaltaryp úlgerse de, kóliktiń oń jaq búıirine soǵylyp, joldyń jıegine qulaıdy. Osy kezde kólik júrgizýshisi keri burylyp, jerde jatqan adamdy basyp ótedi. Kóliginen shyqsa, jerde jatqan adamnyń keýdesi qysylyp, demi tarylady. Osy kezde qyzýqandy jigit óz qateligin túsinedi. Іle-shala jedel járdemdi shaqyrady.
«Jelezın aýdandyq soty shyǵarǵan sheshimge sáıkes, B. esimdi azamat Qylmystyq kodekstiń 106-baby, 1-tarmaǵy boıynsha adamǵa aýyr jaraqat salǵany úshin kináli dep tanylyp, 3 jyl 6 aıǵa bas bostandyǵyn shekteý jazasyna kesildi. Budan bólek, ol jergilikti atqarýshy organdardyń nusqaýymen jylyna 240 saǵattan aspaıtyn jumysqa jegiletin boldy. Sot úkimi kúshine endi», - delingen sottyń resmı habarlamasynda.
