Qyzmettik turǵyn úılerdi jekeshelendirýge shekteýler engizilýi múmkin - S. Nokın
ASTANA. 25 qarasha. QazAqparat - Qyzmettik turǵyn úılerdi jekeshelendirýge shekteýler engizilýi múmkin. Búgin Parlament Májilisinde «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda Óńirlik damý vıtse-mınıstri Serik Nokın osylaı málim etti.
«Qoldanystaǵy tártipke sáıkes, menshik quqyǵyndaǵy basqa da eldi mekenderde turǵyn úıi bar tulǵalar jumys orny boıynsha qyzmettik turǵyn úılerin alýǵa quqyǵy bar ekeni belgili. Sonymen qatar, mundaı azamattar qyzmettik turǵyn úılerin jekeshelendire almaıdy, sebebi is júzinde olardyń jeke turǵyn úıin ıelikten shyǵarý nemese turǵyn úı satyp alý arqyly óziniń baspana máselesin jaqsartýǵa múmkindigi de barshylyq. Osyǵan baılanysty osy tulǵalar úshin turǵyn úılerdi jekeshelendirýge shekteý engiziletin bolady», deıdi Serik Nokın. Onyń aıtýynsha, qyzmettik turǵyn úıde turatyn tulǵalar jekeshelendirýge ótinish bergenge deıingi sońǵy bes jyl ishinde menshik quqyǵyndaǵy úılerdi ıelikten shyǵarǵan jaǵdaıda da turǵyn úılerdi jekeshelendirýge shekteý qoıylmaq.
